جنوبی پنجاب

ڈیرہ غازیخان (صبح پا کستان)کمشنر ڈیرہ غازی خان ڈویژن مدثر ریاض ملک نے چاروں اضلاع کے ہسپتالوں میں ملازمین کی بائیو میٹرک حاضری یقینی بنانے کے احکامات جاری کردئیے ہیں ۔ ہیلتھ اور ایجوکیشن کے روڈ میپ انڈیکٹرز پورے نہ ہونے پر افسران کو شوکاز نوٹسز جاری کرتے ہوئے تحریری وضاحت طلب کرلی ۔ انسداد ڈینگی مہم میں سستی اور کاہلی برداشت نہیں کی جائے گی ۔ انہوں نے یہ بات اپنے آفس میں ایجوکیشن،ہیلتھ،ریونیو اور دیگر محکموں کے اجلاس کی صدارت کرتے ہوئے کہی ۔ ڈیرہ غازیخان،لیہ اور راجنپور کے ڈپٹی کمشنرز وقاص رشید،ذیشان جاوید،افضل ناصر،ایڈیشنل کمشنر اظفر ضیاء، کمانڈنٹ بی ایم پی سید موسیٰ رضا،اے سی جی محمد صفات اللہ،ایڈیشنل ڈپٹی کمشنرز ریونیو،اسسٹنٹ کمشنرز،سی ای اوز،اے ڈی ایل آر،ڈسٹرکٹ منیجر پی ایچ ایف سی اور دیگر افسران موجود تھے ۔ کمشنرنے کہا کہ چاروں اضلاع میں انسداد ڈینگی مہم پر سنجیدگی سے کام کیا جائے ۔ روٹین ای پی آئی،پولیو اور حکومت پنجاب کے تمام انڈیکٹرز سوفیصد پورے کئے جائیں ۔ کمشنر نے کہا کہ ڈویژن کے تعلیمی اداروں میں اساتذہ،طلبہ اور ھیڈ ٹیچرز کی حاضری سمیت بنیادی سہولیات کی موجودگی یقینی بنائی جائے ۔ افسران سرکاری واجبات کی سوفیصد وصولی یقینی بنانے کےلئے ہرممکن وسائل استعمال میں لائیں ۔ میونسپل کمیٹیوں کی آوَٹر باوَنڈری کی حدبندی مقررہ مدت میں مکمل کرائی جائے ۔ اراضی ریکارڈ سنٹرز پر سائلین کی رہنمائی اور سہولت یقینی بنائی جائے ۔ بی ایچ یوز،آر ایچ سی،تحصیل اور ضلعی صدر ہسپتالوں میں ڈاکٹرز اور پیرامیڈیکل سٹاف کا ڈیوٹی روسٹر بناکر نمایاں جگہ پر آویزاں کیا جائے ۔ اجلاس میں دیگر معاملات کا جائزہ لیکر بہتری کےلئے احکامات جاری کئے گئے ۔