ڈیرہ غازی خان

ڈیرہ غازی خان ( صبح پا کستان ) کمشنر ڈیرہ غازی خان ڈویژن اشفاق احمد چوہدری کی ہدایات پر عیدالاضحیٰ کے بعد امن و امان کی صورتحال کو مزید مستحکم بنانے اور سیاحوں کے تحفظ کو یقینی بنانے کے لیے بارڈر ملٹری پولیس (بی ایم پی)، پاکستان رینجرز اور ریسکیو 1122 نے مشترکہ فلیگ مارچ کیا۔ فلیگ مارچ کا آغاز سخی سرور سے کیا گیا جو راکھی گاج، اسٹیل برج اور کھر سمیت مختلف اہم مقامات سے گزرتا ہوا سیاحتی مقام فورٹ منرو تک پہنچا۔ فلیگ مارچ میں سکیورٹی اور امدادی اداروں کی گاڑیوں اور اہلکاروں نے بھرپور شرکت کی، جس کا مقصد عوام میں احساسِ تحفظ پیدا کرنا اور ریاستی اداروں کی موجودگی کو مؤثر انداز میں اجاگر کرنا تھا۔ اس موقع پر سکیورٹی ذرائع کے مطابق عید کی تعطیلات کے دوران اور بعد میں فورٹ منرو آنے والے سیاحوں کی بڑی تعداد کے پیش نظر خصوصی انتظامات کیے گئے ہیں تاکہ ان کی آمدورفت کو محفوظ اور سہل بنایا جا سکے۔ فلیگ مارچ کے ذریعے عوام کو یہ پیغام بھی دیا گیا کہ تمام قانون نافذ کرنے والے اور امدادی ادارے ہر قسم کی صورتحال سے نمٹنے کے لیے مکمل طور پر تیار ہیں۔ کمشنر ڈیرہ غازی خان اشفاق احمد چوہدری کی ہدایات کے مطابق ضلع اور بالخصوص پہاڑی و سیاحتی علاقوں میں امن و امان برقرار رکھنے، سیاحوں کو ہر ممکن سہولیات فراہم کرنے اور کسی بھی ہنگامی صورتحال سے فوری نمٹنے کے لیے تمام متعلقہ ادارے متحرک ہیں۔ ریسکیو 1122 کی ٹیمیں بھی مختلف مقامات پر الرٹ رہیں تاکہ کسی بھی حادثے یا ایمرجنسی کی صورت میں فوری امدادی کارروائی عمل میں لائی جا سکے۔ عوامی حلقوں نے مشترکہ فلیگ مارچ کو خوش آئند قرار دیتے ہوئے انتظامیہ، بی ایم پی، رینجرز اور ریسکیو 1122 کی کاوشوں کو سراہا اور امید ظاہر کی کہ ایسے اقدامات سے علاقے میں امن و امان کی صورتحال مزید بہتر ہوگی اور سیاح خود کو زیادہ محفوظ محسوس کریں گے۔ انتظامیہ کے مطابق سیاحتی مقامات اور اہم شاہراہوں پر نگرانی کا عمل مسلسل جاری رہے گا جبکہ عوام سے بھی اپیل کی گئی ہے کہ وہ قانون نافذ کرنے والے اداروں کے ساتھ تعاون کریں اور کسی بھی مشکوک سرگرمی کی فوری اطلاع متعلقہ اداروں کو دیں۔