ملتان ۔پراسیکیوشن ڈیپارٹمنٹ پنجاب کے زیرِ اہتمام پراسیکیوٹرز اور پولیس کے تفتیشی افسران کے لیے تین روزہ تربیتی ورکشاپ کا انعقاد

ملتان ( صبح پا کستان)پراسیکیوشن ڈیپارٹمنٹ پنجاب کے زیرِ اہتمام پراسیکیوٹرز اور پولیس کے تفتیشی افسران کے لیے منعقدہ تین روزہ تربیتی ورکشاپ کے دوسرے روز سیشن کا افتتاح سیکرٹری پراسیکیوشن پنجاب سلمان غنی نے کیا۔ سیکرٹری پراسیکیوشن نے شرکا سے مخاطب ہوتے ہوئے کہا کہ انٹی ریپ انویسٹی گیشن اینڈ ٹرائل ایکٹ پر مکمل اور مؤثر عمل درآمد وقت کی اہم ضرورت ہے تاکہ ریپ کیسز میں متاثرین کو بروقت اور یقینی انصاف فراہم کیا جا سکے۔ انہوں نے کہا کہ وزیر اعلی پنجاب مریم نواز شریف کی خصوصی ہدایت پر آج کے تربیتی سیشن میں ریپ کیسز کی مؤثر پراسیکیوشن کے حوالے سے خصوصی تربیت دی جا رہی ہے۔ انہوں نے زور دیا کہ ضابطہ فوجداری کی دفعہ 164 کے تحت ریکارڈ ہونے والے بیانات کی ویڈیو ریکارڈنگ کو یقینی بنایا جائے اور معزز عدلیہ کو ان بیانات کو خصوصی مد نظر رکھنا چاہئے تاکہ بعد ازاں گواہوں کے منحرف ہونے کی صورت میں قانونی تقاضے پورے کیے جا سکیں۔ سلمان غنی نے اس امر پر بھی تشویش کا اظہار کیا کہ ریپ کیسز میں بعض اوقات گواہان اپنے ابتدائی بیانات سے منحرف ہو جاتے ہیں، جس سے مقدمات کمزور پڑ جاتے ہیں۔ انہوں نے ہدایت کی کہ ایسے گواہوں کے خلاف قانونی کارروائی کے لیے باقاعدہ لائحہ عمل وضع کیا جائے تاکہ پراسیکیوشن کو مضبوط شہادتیں میسر آ سکیں اور انصاف کی فراہمی کا عمل متاثر نہ ہو۔ ورکشاپ میں پراسیکیوٹرز اور تفتیشی افسران کو شہادتوں کے مؤثر اندراج، ویڈیو ریکارڈنگ، اور بین الاداراتی تعاون کے حوالے سے سینئر ایڈووکیٹ شہریار احسن، انچارج پراسیکیوشن ہائی کورٹ ملتان بنچ عبدالودود اور ڈسٹرکٹ پراسیکیوٹر ملتان امتیاز رسول چیمہ نے رہنمائی فراہم کی۔