ڈیرہ غازی خان ۔کوہ سلیمان کے دامن سے مون سون سیلابی ریلے سے صدیوں پرانے نایاب سکے اور قدیمی نوادرات دریافت

ڈیرہ غازی خان (صبح پا کستان )ڈیرہ غازی خان کے کوہ سلیمان کے دامن سے مون سون بارشوں کے باعث آنے والے سیلابی ریلے نے صدیوں پرانے نایاب سکے اور قدیمی نوادرات دریافت کرائے۔ ڈپٹی کمشنر ڈیرہ غازی خان محمد عثمان خالد اور پولیٹیکل اسسٹنٹ امیر تیمور کے ہمراہ ڈپٹی ڈائریکٹر آثارِ قدیمہ سلمان تنویر کی قیادت میں محکمہ آثارِ قدیمہ کی خصوصی ٹیم سخی سرور پہنچی اور ملنے والے سکوں اور نوادرات کا تفصیلی معائنہ کیا۔ڈپٹی کمشنر محمد عثمان خالد نے بتایا کہ مقامی لوگوں نے 400 سے 500 تک قدیمی سکے رضاکارانہ طور پر ضلعی انتظامیہ کے حوالے کیے تاکہ انہیں محفوظ بنایا جا سکے۔رضاکارانہ طور پر سکے فراہم کرنے والے مقامی افراد کے لیے تعریفی اسناد اور انعامات کےلئے سفارشات ارسال کی جائیں گی۔ان سکوں میں مختلف ادوار اور سلطنتوں کے سکے شامل ہیں جن میں مغل، تغلق، سکھ عہد، ویما دیوا کنشکا،درانی، لودھی خاندان، برطانوی دور، نادر شاہ، بہادر شاہ ظفر اور وسطی ایشیا و عرب دنیا کے سکے نمایاں ہیں۔ڈپٹی کمشنر محمد عثمان خالد نے کہا کہ ان نوادرات کی دریافت نہ صرف اس خطے کی تاریخی و تہذیبی حیثیت کو اجاگر کرتی ہے بلکہ مستقبل میں بین الاقوامی سطح پر سیاحت، تحقیق اور مقامی روزگار کے مواقع پیدا کرنے میں اہم کردار ادا کرے گی۔ڈپٹی کمشنر نے کہا کہ کمشنر ڈیرہ غازی خان ڈویژن اشفاق احمد چوہدری کی خصوصی ہدایت پر ٹیم کو لیکر پہنچے ہیں۔ ان کا کہنا تھا کہ کوہ سلیمان کے اس علاقے میں قدیم تجارتی قافلے گزرتے رہے ہیں جس کے باعث اس خطے کو تاریخی اور تہذیبی لحاظ سے منفرد اہمیت حاصل ہے۔ڈپٹی ڈائریکٹر آثارِ قدیمہ سلمان تنویر نے کہا کہ آئندہ کھدائی اور تحقیق کے ذریعے مزید قدیم ورثہ دریافت کیا جائے گا جبکہ اس مقام کو ریسرچ سینٹر اور سیاحتی مقام کے طور پر ڈویلپ کرنے کے لیے سفارشات مرتب کی جا رہی ہیں۔پولیٹیکل اسسٹنٹ امیر تیمور نے کہا کہ مقامی لوگوں نے اپنے کردار سے تاریخ کو محفوظ کرنے کی بہترین مثال قائم کی ہے۔