لیہ نیوز

لیہ(صبح پا کستان) پاکستان تحریک انصاف آئندہ الیکشن میں کلین سویپ کریگی، عمران خان نے ثابت کر دیا کہ ن لیگ چوروں ڈاکوؤں کا ٹولہ ہے، زمان خان کو پاکستان تحریک میں شمولیت پر مبارکباد پیش کرتے ہیں اور خوش آمدید کہتے ہیں ان خیالات کا اظہار زمان خان کی پاکستان تحریک انصاف میں شمولیت کے موقع پر منعقدہ پروقار تقریب سے خطاب کرتے ہوئے ضلعی صدر پاکستان تحریک انصاف بشارت رندھاوا نے کیا۔ تقریب سے خطاب کرتے ہوئے سابق ایم این اے ملک نیاز احمد جکھڑ، سابق ایم پی اے افتخار علی بابر کھتران، پیر سید رفاقت علی گیلانی، زاہد الرحمن تحصیل صدر ، تحصیل جنرل سیکرٹری سمیع اللہ گرواں و دیگر نے خطاب کرتے ہوئے زمان خان کو خوش آمدید کہا اور صدر لیر ونگ نور خان سلیمان خیل کی کاوشوں کو سراہا جن کی کوششوں سے زمان خان نے ن لیگ کو چھوڑ کر پاکستان تحریک انصاف میں شمولیت اختیار کی۔انہوں نے کہا کہ عوام کی طاقت سے کرپشن کا خاتمہ ممکن ہے، انہوں نے کہا کہ نواز شریف کہتا ہے مجھے کیوں نکالا ابھی تک اسے سمجھ نہیں آئی کہ اسے کیوں نکالا، عمران خان کی تحریک نے ثابت کر دیا کہ ن لیگ کرپشن کا گڑھ ہے اور ان سے لوٹی ہوئی دولت بھی واپس لائی جائیگی۔ انہوں نے کہا کہ عوام آئندہ الیکشن میں ثابت کر دینگے کہ پاکستان تحریک انصاف ایک سچی اور کھری جماعت ہے اور اس کا سربراہ ایک ایماندار اور فرض شناس شخص ہے، آئندہ حکومت پاکستان تحریک انصاف کی ہوگی ۔ تقریب کے آخر میں زمان خان نے اپنے خطاب میں قیادت کو یقین دلایا کہ وہ پاکستان تحریک انصاف کے ویژن کے مطابق چلتے ہوئے پارٹی کو مضبوط کرنے میں کوئی کسر نہ چھوڑیں گے۔ تقریب کے اختتام پر مہمانوں و کارکنان کیلئے پرتکلف کھانے کا اہتمام بھی کیا گیا تھا۔