جنوبی پنجاب

ڈیرہ غازیخان(صبح پا کستان) میئر میونسپل کارپوریشن ڈیرہ غازیخان شاہد حمید چانڈیہ نے کہا ہے کہ نیا ٹیلنٹ ہمارا مستقبل اور ملک کی پہچان ہے جس نے آگے چل کر ملک کی ترقی میں اپنا کردارادا کرناہے. ڈیرہ کے نوجوانوں میں بے پناہ ٹیلنٹ موجودہے . انہیں مناسب مواقع فراہم کیے جائیں تو دنیا میں اپنے ملک کا نام روشن کرسکتے ہیں . طلبہ میں آگے بڑھنے کا جذبہ پیدا کرنے کیلئے برین آف ڈی جی خان جیسے مقابلوں کا انعقاد اچھا اقدام ہے جس سے طلباؤطالبات کو اپنی ذہنی وتخلیقی صلاحیتوں کو آزمانے کا موقع ملا ہے .انہوں نے ان خیالات کااظہار آج پنجاب گروپ آف کالجز کے سبزہ زار میں برین آف ڈی جی خان کے پوزیشن ہولڈرز میں کیش ایوارڈ ، گولڈ میڈل تقسیم کرنے کے سلسلے میں منعقدہ تقریب میں مہمان خصوصی کی حیثیت سے خطاب کرتے ہوئے کیا. تقریب میں وزیر اعلی پنجاب کے مشیر میر مرزا تالپور ، ڈپٹی میئر شیخ اسرار احمد ، ڈائریکٹر کالجزڈاکٹر پروفیسر الطاف حسین، ڈپٹی ڈائریکٹر کالجز پروفیسر مظہر حسین گشکوری، پرنسپل گورنمنٹ پوسٹ گریجویٹ کالج آف کامرس پروفیسر سجاد حسین ، پرنسپل ڈی پی ایس چودھری محمد اظہر ، پرنسپل سینٹر آف ا یکسی لینس گورنمنٹ بوائز ہائی سکول نمبر 1کرنل(ر) محمد اعجاز ملک ، پرنسپل گورنمنٹ گرلز ہائی سکول نمبر 1مسز طاہرہ کلثوم ، پرنسپل گورنمنٹ گرلز ہائی سکول خیابان سرور اسماء بتول ، کرنل محمد قطب ، سابق پرنسپل پروفیسر محمد ایوب فاروقی کے علاوہ سرکاری و نجی تعلیمی اداروں کے سربراہوں، اساتذہ ، والدین اور طلباؤطالبات نے شرکت کی . میئر شاہد حمید چانڈیہ نے تقریب سے خطاب کرتے ہوئے کہاکہ وزیر اعلی پنجاب محمد شہباز شریف کی تعلیمی پالیسیوں اور عملی اقدامات سے صوبہ میں خواندگی کی شرح میں خاطر خواہ اضافہ ہوا ہے . میرٹ کی بالادستی پر سختی سے عملدرآمد کرانے سے ذہین طلباؤطالبات کو اپنی صلاحیتوں کوآزمانے کے مواقع مل رہے ہیں .ان کی تعلیم دوستی نے معیار تعلیم کو اتنا بلند کیا ہے جس کی ماضی میں مثال نہیں ملتی مشیر وزیر اعلی میر مرزا تالپور نے پوزیشنیں حاصل کرنے والے طلبہ کو مبارکباد دیتے ہوئے امید ظاہر کی کہ وہ مزیدمحنت کر کے اپنے ملک کے ساتھ ادارہ اور شہر کا نام روشن کریں گے . ڈائریکٹر کالجز پروفیسر ڈاکٹر الطاف حسین نے اپنے خطاب میں کہاکہ پنجاب گروپ آف کالجز کی طرف سے برین آف ڈی جی خان کے مقابلے کا انعقاد اچھا اقدام ہے ایسے ہونہار طالب علم جو اپنے تعلیمی اداروں میں صرف متعارف تھے انہیں اس مقابلے میں حصہ لینے کا فراہم کیا اور وہ اپنی قابلیت اور ذہانت سے ونر قرار پائے .ڈائریکٹر پنجاب گروپ آف کالجز رانا کامران ستار نے ادارے کی کارکردگی پر روشنی ڈالتے ہوئے کہاکہ پنجاب کالج واحد تعلیمی ادارہ ہے جو طلباؤطالبات کی نہ صرف نصابی بلکہ ہم نصابی سرگرمیوں پر زور دیتاہے بچوں کی ذہنی صلاحیتوں کو ابھارنے کیلئے مختلف پروگرام منعقد کیے جاتے ہیں . برین آف ڈی جی خان کا مقابلہ اسی سلسلے کی کڑی ہے . تقریب کے آخر میں میئر شاہد حمید چانڈیہ ،میر مرزا تالپور ،ڈاکٹر ا لطاف حسین اور پرنسپل ادارہ کامران ستار نے برین آف ڈی جی خان کے مقابلہ میں پہلی پوزیشن حاصل کرنے والی شیخ زید نیو ویژن سکول چوٹی کی طالبہ ماورا زاہد کو گولڈ میڈل ، 30ہزار روپے کیش انعام اور شیلڈ ، دوسری پوزیشن حاصل کرنے والے سکالرز بوائز سکینڈری سکول ڈیرہ غازیخان کے طالب علم محمد عزیر کو سلور میڈل ، 20ہزار روپے کیش ا نعام اور شیلڈ جبکہ تیسری پوزیشن حاصل کرنے والے سنٹر آف ایکسی لینس گورنمنٹ بوائز ہائی سکول نمبر 1کےطالب علم انس فاروق کو سلور میڈل اور دس ہزار روپے کیش انعام دیا . میئر نے پہلی پوزیشن حاصل کرنے والی طالبہ ماورا زاہد کو ا پنی جیب سے بھی پانچ ہزار روپے دیئے . پنجاب گروپ آف کا لجز کی طرف سے بہترین نتائج دینے والے تعلیمی اداروں کے سربراہوں میں خصوصی انعامات تقسیم کیے گئے جبکہ میئر ، ڈپٹی میئر ، مشیر وزیر اعلی اور ڈائریکٹر کالجز کو خصوصی شیلڈز دی گئیں .