لاہور

گجرات. پیپلزپارٹی کے رہنما قمر زمان کائرہ کے بیٹے اسامہ قمر کی نماز جنازہ آج دوپہر 3 بجے ادا کی جائے گی۔ تفصیلات کے مطابق پاکستان پیپلزپارٹی کے سینئر رہنما قمرزمان کائرہ کے بیٹے اسامہ قمرکی نمازجنازہ لالہ موسیٰ مین جی ٹی ردڈ لنک سکول گراؤنڈ میں آج 3 بجے ادا کی جائے گی۔ پاکستان پیپلزپارٹی پنجاب کے صدر قمر زمان کائرہ کے بیٹے اسامہ قمر گزشتہ روزکھاریاں سے لالہ موسیٰ آتے ہوئے ٹریفک حادثے میں جاں بحق ہو گئے تھے۔اسامہ قمر کی گاڑی موٹرسائیکل سوار کو بچاتے ہوئے حادثے کا شکار ہوئی، حادثے میں اسامہ قمر کا ایک دوست بھی جاں بحق جبکہ دیگر زخمی ہوئے۔ وزیراعظم عمران خان نے قمر زمان کائرہ کے جواں سال بیٹے کی وفات پرافسوس کا اظہار کرتے ہوئے غمزدہ والدین اور خاندان کے لیے صبر کی دعا کی۔آرمی چیف جنرل قمر جاوید باجوہ نے جواں سال اسامہ قمر کے انتقال پر افسوس کا اظہار کرتے ہوئے سوگوار والدین کے لیے نا قابل تلافی صدمہ برداشت کرنے کی دعا کی۔ پیپلزپارٹی پنجاب کے صدر قمرزمان کائرہ کا بیٹا کار حادثے میں جاں بحق گجرات: پیپلز پارٹی کے مرکزی رہنما و صوبائی صدر قمر زمان کائرہ کا بیٹا اسامہ ٹریفک حادثے میں جاں بحق ہوگیا۔ ایکسپریس نیوز کے مطابق پیپلز پارٹی پنجاب کے صدر اور سینئر سیاست دان قمر زمان کائرہ کا جواں سال بیٹا اسامہ ٹریفک حادثے میں جاں بحق ہوگیا۔ اسامہ کائرہ گورنمنٹ کالج لاہور کا طالب علم تھا۔ پولیس حکام کے مطابق اسامہ کائرہ کار نمبر بی ایس 447 پر سوار تھا اور گھر سے چند کلومیٹر کے فاصلے پر کار بے قابو ہو کر درخت سے ٹکرا کر حادثے کا شکار ہو گئی اور اسامہ کائرہ موقع پر جاں بحق ہوگئے۔ قمر زمان کائرہ کو بیٹے کی ہلاکت کی اطلاع اسلام آباد میں دی گئی جس کے بعد سے وہ غم سے نڈھال ہیں۔ بیٹے کی ہلاکت پر آرمی چیف، حکمراں جماعت تحریک انصاف، پیپلز پارٹی، مسلم لیگ (ن)، ایم کیو ایم، عوامی تحریک سمیت دیگر سیاسی و مذہبی جماعتوں کے رہنماؤں نے قمر زماں کائرہ سے اظہار تعزیت کیا ہے۔ آرمی چیف قمر جاوید باجوہ نے قمر زمان کائرہ کے بیٹے کی وفات پر اظہار افسوس کیا ہے۔ آئی ایس پی آر کے مطابق اپنے تعزیتی پیغام میں آرمی چیف جنرل قمر جاوید باجوہ نے کہا کہ اللہ تعالیٰ مرحوم کے والدین کو ناقابل تلافی نقصان برداشت کرنے کی توفیق عطا فرمائے۔ اسپیکر قومی اسمبلی اسد قیصر نے تعزیت کرتے ہوئے کہا کہ قمر زماں کے جواں سال بیٹے کے انتقال کی خبر سن کر دلی رنج اور افسوس ہوا۔ ڈپٹی اسپیکر قاسم سوری نے کہا کہ غم کی اس گھڑی میں کائرہ فیملی کے ساتھ ہیں۔ وزیراعظم کی معاون خصوصی برائے اطلاعات فردوس عاشق اعوان نے کہا کہ اسامہ قمر کی ٹریفک حادثے میں موت پر بہت دکھ ہوا، ہم سب قمر زمان کائرہ اور ان کے خاندان کے ساتھ اس غم میں شریک ہیں، اللہ تعالی اہل خانہ کو یہ بڑا غم برداشت کرنے کی ہمت عطا فرمائے۔ سابق وزیر اعظم شاہد خاقان عباسی نے کہا کہ جواں سال بیٹے اسامہ کی وفات پر بے حد افسوس ہوا، اللہ تعالی اہل خانہ کو یہ ناقابل تلافی نقصان اور بڑا غم برداشت کرنے کی توفیق دے۔ عوامی تحریک کے سربراہ ڈاکٹر طاہر القادری نے حادثاتی موت پر گہرے دکھ کا اظہار کرتے ہوئے کہا کہ اللہ تعالی مرحوم کی بخشش فرمائے اور سوگوار خاندان کو یہ صدمہ برداشت کرنے کی توفیق دے۔ ایم کیو ایم پاکستان کے کنوینر ڈاکٹر خالد مقبول صدیقی نے کہا کہ اللہ تعالی قمر زمان کائرہ اور ان کے اہل خانہ کو صبر جمیل عطا کرے۔