Tag: lahore news

لاہور۔ پنجاب پولیس نے شہداء کے لواحقین اور غازیوں سمیت پولیس ملازمین کی فلاح و بہبود کے لیے 80کروڑ روپے جاری کر دیئے۔ ڈی آئی جی ویلفیئر غازی صلاح الدین نے بتایا کہ آئی جی پنجاب ڈاکٹر عثمان انور پولیس شہداء کے لواحقین اورغازیوں سمیت حاضر سروس ملازمین کی ویلفیئر کیلئے سرگرم عمل ہیں، شہداء ، غازیوں ، دیگر پولیس ملازمین اوران کے اہل خانہ کو 80 کروڑ روپے کی رقم مختلف کیٹیگریز میں دی گئی۔ غازی صلاح الدین کے مطابق یکم مارچ تک پولیس ملازمین کے بچوں کے تعلیمی سکالرشپس کا ایسا کوئی کیس زیر التواء نہیں رہے گا جن پر وظائف جاری نہ ہو چکے ہوں۔ ڈی آئی جی ویلفیئر کا کہنا ہے کہ دوران سروس مختلف آپریشنز میں اپاہج اور مکمل معذور غازیوں کو سرجیکل بیڈز، الیکٹریکل چئیرز اور مصنوعی اعضاء کی فراہمی کی منظوری ہو گئی ہے، لگ بھگ 150 پولیس غازیوں کو جدید سرجیکل آلات اور مصنوعی اعضاء سمیت ہر ممکن علاج کی سہولت حاصل ہوگی، شہداء پیکیج کے تمام زیر التواء کیسز پر دفتری کارروائی مکمل کرکے امدادی رقوم جاری کر دی گئی ہیں۔ غازی صلاح الدین کا مزید کہنا ہے کہ شہداء کے خاندانوں کو ان کی پسند کے مطابق گھروں کی فراہمی کے لئے فنڈز متعلقہ اضلاع کو منتقل کر دیئے گئے ہیں، پولیس ملازمین اور ان کے اہل خانہ آئی جی پی شکایت سیل 1787 اور ہیلپ لائن 99212337 پر بھی رابطہ کر کے اپنا مسئلہ حل کروا سکتے ہیں۔