لاہور . قانون نافذ کرنے والے اداروں نے لاہور میں جناح ہاؤس اور دیگر فوجی تنصیبات پر حملہ کرنے والے کچھ شر پسندوں کی شناخت کرلی اور دیگر کی شناخت کا سلسلہ جاری ہے۔
جناح ہاؤس کو جلانے، توڑ پھوڑ کرنے اورقیمتی اشیاء و دستاویزات چوری کرنے والے شرپسندوں کی نشاندہی کر کے اُن کے خلاف قانونی کارروائی کا آغاز ہو چکا ہے۔
اب تک بیشتر افراد کی شناخت ہو گئی ہے جنہوں نے کور کمانڈر ہاؤس کا جلاؤ گھیراؤ اور توڑ پھوڑ کی پرتشدد کارروائیوں میں حصہ لیا تھا جبکہ باقیوں کی شناخت کا سلسلہ جاری ہے۔ ان شر پسندوں کے خلاف انسداد دہشتگردی کے تحت ایف آئی آر درج کی گئی۔
سکیورٹی اداروں نے شرپسندوں میں اویس مشتاق،عباد فاروق، محمد حاشر خان اور جہانزیب کی نشاندہی کر لی ، پرتشدد کارکنان مسلح آتشیں اسلحہ، ڈنڈے ، پتھر و پٹرول بم سے لیس تھے۔
اس کے ساتھ ساتھ ایسے مزید افراد جنہوں نے ملک کے دیگر علاقوں میں ملکی املاک کو نقصان پہنچایا وہ بھی قانون کی گرفت میں آرہے ہیں۔
