Tag: DG khan news

ڈیرہ غازی خان ( صبح پا کستان ): چیئرمین سینیٹ یوسف رضا گیلانی نے ڈیرہ غازی خان میں کھوسہ منزل آمد کے موقع پر سابق گورنر پنجاب سردار ذوالفقار علی کھوسہ کے انتقال پر گہرے دکھ اور افسوس کا اظہار کیا۔چیئرمین سینیٹ نے مرحوم کی سیاسی و سماجی خدمات کو خراجِ عقیدت پیش کرتے ہوئے کہا کہ سردار ذوالفقار علی کھوسہ ایک زیرک سیاستدان اور مدبر رہنما تھے جن کی خدمات کو ہمیشہ یاد رکھا جائے گا۔ انہوں نے مرحوم کے درجات کی بلندی اور اہل خانہ کیلئے صبر جمیل کی دعا بھی کی۔ اظہار تعزیت کے موقع پر کمشنر اشفاق احمد چوہدری،ار پی او اظہر اکرم، ڈپٹی کمشنر محمد عثمان خالد اور دیگر افسران بھی موجود تھے.اس موقع پر میڈیا سے گفتگو کرتے ہوئے چیئرمین سینیٹ یوسف رضا گیلانی نے پاکستان میں جاری اہم سفارتی پیش رفت پر اظہار خیال کیا۔ انہوں نے کہا کہ پاکستان کی تاریخ کا آج ایک اہم دن ہے اور مذاکرات بڑی کامیابی قرار دیے جا سکتے ہیں۔چیئرمین سینیٹ نے کہا کہ امید ہے کہ ایران۔امریکہ مذاکرات کامیاب ہوں گے اور مذاکرات کی کامیابی کا فائدہ نہ صرف خطے بلکہ پوری دنیا کو ہوگا۔ ان کا کہنا تھا کہ پاکستان نے عالمی سطح پر کشیدگی کم کرنے اور ممکنہ عالمی جنگ کو رکوانے میں مثبت اور مؤثر کردار ادا کیا ہے جس سے ملک کا وقار بلند ہوا ہے۔انہوں نے مزید کہا کہ بھارت کو مؤثر جواب دینے کے بعد پاکستان کا قد عالمی سطح پر مزید بلند ہوا ہے اور پاکستان ایک ذمہ دار اور باوقار ریاست کے طور پر ابھرا ہے۔