ڈیرہ غا زیخان ( صبح پا کستان ): حالیہ بارشوں کے بعد دریائے سندھ میں طغیانی کی صورت حال کے پیشِ نظر کمشنر ڈیرہ غازی خان ڈویژن اشفاق احمد چوہدری ضلع لیہ کے نشیبی علاقوں میں پہنچ گئے جہاں انہوں نے حفاظتی بند، ریسکیو پوائنٹس اور طبی و ویٹرنری کیمپوں کا تفصیلی معائنہ کیا۔ ان کے ہمراہ ڈپٹی کمشنر امیرا بیدار، اسسٹنٹ کمشنر لیہ حارث حمید خان، ایکسیئن انہار، سی ای او ہیلتھ، ایڈیشنل ڈائریکٹر لائیو سٹاک، ڈسٹرکٹ ایمرجنسی آفیسر اور متعلقہ محکموں کے افسران بھی موجود تھے۔کمشنر اشفاق احمد چوہدری نے بکھری احمد خان کے مقام پر دریائی کٹاؤ روکنے کے لئے لگائی جانے والی پتھر کی پچنگ کا جائزہ لیا اور ہدایات جاری کیں۔ انہوں نے شاہ والا، کھوکھر والا، گجی والا اور چانڈیہ والا موضع کا بھی تفصیلی معائنہ کیا۔ اس دوران کمشنر نے ضلعی انتظامیہ کی طرف سے قائم فلڈ کیمپس و ریسکیو پوائنٹس، ہیلتھ اور وٹرنری کیمپوں کا دورہ کرتے ہوئے ادویات اور ویکسین کی دستیابی کو تسلی بخش قرار دیا۔ انہوں نے لوگوں اور مال مویشیوں کے انخلاء کے لئے ریسکیو 1122 کی تیاریوں کو بھی سراہا اور ہدایت کی کہ پانی اترنے تک افسران اور فیلڈ اسٹاف ریسکیو پوائنٹس پر موجود رہیں تاکہ عوام کو علاج معالجہ اور ریلیف کی بہترین سہولت میسر ہو۔کمشنر ڈی جی خان نے اس موقع پر گفتگو کرتے ہوئے کہا کہ موسمیاتی تبدیلیوں کے باعث نئے چیلنجز کا سامنا ہے، حکومت پنجاب نشیبی علاقوں کے عوام کو درپیش مشکلات سے بخوبی آگاہ ہے اور وزیر اعلیٰ پنجاب مریم نواز شریف کی ہدایات کے مطابق انتظامیہ مکمل طور پر الرٹ ہے۔ انہوں نے کہا کہ دریائے سندھ میں 15 اگست کے بعد طغیانی الارمنگ ہے تاہم ضلعی انتظامیہ کی طرف سے ممکنہ سیلابی صورت حال سے نمٹنے کے لئے بہترین انتظامات کیے گئے ہیں۔کمشنر نے ہدایت کی کہ عوام اور مال مویشیوں کو علاج معالجہ کی تمام سہولیات فراہم کی جائیں جبکہ فصلوں اور مکانات کے نقصانات کے لئے دیانتداری سے سروے کر کے رپورٹ کمشنر آفس کو ارسال کی جائے۔ بعد ازاں انہوں نے ہیڈ ریگولیٹری لالہ کریک کا بھی معائنہ کیا جہاں ڈپٹی کمشنر امیرا بیدار نے انہیں بریفنگ دی کہ پانی کو ہیڈ ریگولیٹری کے ذریعے کنٹرول کر کے ملحقہ آبادیوں کو محفوظ رکھا جا رہا ہے۔عوامی حلقوں نے کمشنر ڈی جی خان کے ہنگامی دورے اور حفاظتی انتظامات کے جائزے پر اطمینان کا اظہار کیا اور کہا کہ ان اقدامات سے نشیبی علاقوں کے عوام کو بروقت ریلیف فراہم ہوگا۔