چوک اعظم ؛نامعلوم شخص کی میت کی باعزت تدفین، محمد عمر شاکر نے انسانیت کی اعلیٰ مثال قائم کر دی

چوک اعظم ( صبح پا کستان)؛نامعلوم شخص کی میت کی باعزت تدفین، محمد عمر شاکر نے انسانیت کی اعلیٰ مثال قائم کر دی چوک اعظم میں گزشتہ روز ملنے والی ایک نامعلوم شخص کی میت کو سماجی رہنما اور صدر کمیونٹی ڈویلپمنٹ آرگنائزیشن محمد عمر شاکر کی کاوشوں سے باعزت طور پر سپردِ خاک کر دیا گیا۔ محمد عمر شاکر نے انسانیت، اخوت اور ہمدردی کی اعلیٰ مثال قائم کرتے ہوئے میت کو اپنے ذمے لیا، غسل دیا، نمازِ جنازہ ادا کروائی اور تدفین کے تمام مراحل مکمل کروائے۔ محمد عمر شاکر کی نگرانی میں پولیس اور میونسپل کمیٹی کی تمام قانونی کارروائی مکمل کروائی گئی، جس کے بعد کمیونٹی ڈویلپمنٹ آرگنائزیشن (رجسٹرڈ) اور شہری اتحاد چوک اعظم کے تحت مقامی قبرستان میں نامعلوم شخص کی تدفین عمل میں لائی گئی۔ نمازِ جنازہ میں مرزا رضوان بیگ، محمد اجمل سندھو، حافظ محمد رضوان، رانا محمد اعظم، غلام مصطفیٰ وڑائچ، صائم حفیظ علوی سمیت عوامی، سماجی اور کاروباری شخصیات کی بڑی تعداد نے شرکت کی۔ شرکاء نے محمد عمر شاکر کے اس اقدام کو سراہتے ہوئے کہا کہ انہوں نے یہ ثابت کر دیا کہ اصل خدمتِ خلق وہی ہے جو بغیر نام و شناخت کے، محض انسان ہونے کے ناطے کی جائے۔ عوامی، سماجی اور کاروباری حلقوں نے متفقہ طور پر اس انسان دوست اقدام کو زبردست خراجِ تحسین پیش کیا۔ شرکاء کا کہنا تھا کہ ایسے فلاحی اقدامات معاشرے میں اخوت، ہمدردی، بھائی چارے اور انسانیت کے فروغ کا سبب بنتے ہیں اور نئی نسل کے لیے عملی مثال ہیں۔