جنوبی پنجاب

لیہ(صبح پا کستان )لیہ تھل میلہ اور تھل جیپ ریلی کی تین روزہ رنگا رنگ تقریبات اختتام پذیر ہوگئیں ۔صوبائی وزیر بیت المال اجمل چیمہ نے ربن کاٹ کر لیہ تھل میلہ کے تیسرے اور آخری دن کی تقریبات کا افتتاح کیا ممبران اسمبلی ملک نیاز احمد جکھڑ ، طاہر رندھاوا ، ملک احمد علی اولکھ چےئرمین ضلع کونسل ملک عمر علی اولکھ ، سابق صوبائی وزیر بہادر خان سہیڑ ،معاون خصوصی وزیر اعلیٰ پنجاب سید رفاقت علی گیلانی ،ڈپٹی کمشنر بابر بشیر ،ڈی پی او طاہر رحمان ، اے ڈی سی آر فخر الاسلام ڈوگر ، ضلعی صدر پی ٹی آئی بشارت رندھاوا ، ضلعی افسران اور ہزاروں کی تعداد میں شائقین موجود تھے صوبائی وزیر خوراک سمیع اللہ چوہدری نے اختتامی تقریب میں بطور مہمان اعزاز شرکت کی ۔تقریبات کا آغاز قومی پرچم کشائی اور قومی ترانے سے کیا گیا ۔لیہ تھل میلہ میں خواتین اور بچوں کی بھی بڑی تعداد نے شرکت کی ۔اس موقع پر طلباء نے ٹیبلوز ، خاکے ، جھومر اور ملی نغمے پیش کئے لیہ تھل میلہ میں ڈھول کی مخصوص تھاپ پر گھوڑوں نے خوبصورت رقص پیش کیا ۔سپورٹس ڈیپارٹمنٹ کی طرف سے شائقین کے لئے والی بال اور کبڈی کے میچوں کا اہتمام کیا گیا۔ والی بال میچ غازی کلب جبکہ کبڈی کا میچ فیصل آباد ٹیم نے 33کے مقابلہ میں 43پوائنٹس سے جیت لیا ۔ بعد ازاں مہمان خصوصی صوبائی وزیر بیت المال اجمل چیمہ اور مہمان اعزاز صوبائی وزیر خوراک سمیع اللہ چوہدری نے انتظامی افسران ،پلےئرز اور نمایاں کارکردگی دکھانے والے افراد اور صحافیوں میں ٹرافیاں ،شیلڈز ،تعریفی اسناد اور سرائیکی اجرک تقسیم کیں ۔ اختتامی تقریب سے خطاب کرتے ہوئے صوبائی وزیر بیت المال اجمل چیمہ نے کہا کہ لیہ تھل میلہ ایک شاندار ایونٹ تھا جس کے کامیاب انعقاد کیلئے منتظمین کی کاوشیں قابل داد ہیں ۔انہوں نے کہا کہ پاکستان جس قسم کے مشکل حالات سے گزر رہا ہے اس میں اس طرح کے میلے اور پروگرام لوگوں میں خوشیاں بانٹنے کا سبب بنتے ہیں انہوں نے کہا کہ ایم پی اے طاہر رندھاوا علاقہ کی بہتری کے لئے ہمہ وقت فکر مند رہتے ہیں وہ صرف لیہ کے لالہ ہی نہیں بلکہ پورے پنجاب کے لالہ ہیں ۔تقریب سے صوبائی وزیر خوراک سمیع اللہ چوہدری نے خطاب کرتے ہوئے کہا کہ تھل کے ریگزار میں انتہائی محدود وسائل کے باوجود کامیاب میلے کا انعقاد ایک خوش آئند امر ہے ۔انہوں نے کہا کہ اس طرح کے میلے لوگوں کو قریب لانے اور مل بیٹھنے کا موقع فراہم کرتے ہیں ۔انہوں نے کہا کہ علاقہ کی بہتری کے لئے مقامی قائدین کی تمام وسائل سے مدد ومعاونت کی جائے گی ۔تقریب سے ضلعی صدر پی ٹی آئی بشارت رندھاوا نے خطاب کرتے ہوئے کہا کہ لیہ تھل میلہ کے علاقہ کی تعمیر و ترقی اور فلاح و بہبود پر دوررس اثرات مرتب ہونگے انہوں نے کہا کہ آئندہ سال وزیر اعلیٰ پنجاب سے گزارش کر کے تھل جیپ ریلی کا آغاز اور اختتام لیہ تحصیل چوبارہ میں لیہ تھل میلہ کے مقام پر کیا جائے گا ۔