Tag: DG khan news

ڈیرہ غازیخان (صبح پا کستان ). ضلع ڈیرہ غازیخان میں گندم خریداری مہم کا باقاعدہ آغاز کر دیاگیاہے کاشتکاروں کو باردانہ کی ترسیل شروع کرنے کے ساتھ 27اپریل سے خریداری کی جائے گی. ضلع بھر میں 9خریداری مراکز سے 96000میٹرک ٹن گندم خریدی جائے گی . صوبہ بھر میں مہم کو شفاف بنانے کیلئے وزراء اور سیکرٹریز کی ڈیوٹیاں لگانے کے ساتھ ہیلی پیڈ تیار کرلیے گئے ہیں .ضلع ڈیرہ غازیخان میں گندم خریداری مہم کی نگرانی کیلئے سیکرٹری انہار پنجاب کیپٹن (ر)اسد اللہ خان کو ذمہ داریاں سونپ دی گئی ہیں . یہ بات ڈپٹی کمشنر محمد ابراہیم جنید کی زیر صدارت اس سلسلے میں منعقدہ اجلاس میں بتائی گئی . ڈپٹی کمشنر نے کہاکہ حکومت پنجاب کی ہدایت پر چھوٹے کاشتکاروں کو ریلیف دیا جائے گا . آٹھ بوری فی ایکڑ کے حساب سے زیادہ سے زیادہ دس ایکڑ تک کیلئے بار دانہ دیا جائیگا تاکہ زیادہ کاشتکار مستفید ہوں . میرٹ اور شفاف طریقے سے بار دانہ کا اجراء اور ریکارڈ مرتب کیاجائے گا. ضلعی فوکل پرسن ؍اے ڈی سی آر میاں محمد اقبال مظہر مہار نے بتایا کہ دوزراء اور سیکرٹریز اپنے متعین کردہ اضلاع کے خریداری مراکز کا ہفتہ میں کم سے کم دو دورے کریں گے . تمام مراکز پر فوڈ ،ریونیو ، تعلیم ، مارکیٹ کمیٹی اور دیگر محکموں کے نمائندے تعینات کرنے کے ساتھ سکیل 17اور اوپر کے گزیٹڈ افسران کو سنٹرکوآرڈینیٹر تعینات کیاگیاہے . تمام مراکز پر بار دانہ کیلئے اہل کاشتکاروں کی فہرستیں آویزاں کر دی گئی ہیں . اجلاس میں اے سی عبدالجبار ، ڈی ایف سی ، ای اے ڈی اے ، سیکرٹریز مارکیٹ کمیٹی ، سنٹرز کوآرڈینیٹر، آئی ٹی ٹیچر اور دیگر متعلقہ افسران شریک تھے .