لاہور (مانیٹرننگ ڈیسک): باغوں کا شہر لاہور ایک بار پھر دہشتگردوں کے نشانے پر، بیدیاں روڈ پر مردم شماری کی ٹیم کی گاڑی پر خود کش حملے کے نتیجے میں 4 فوجی اہلکاروں سمیت 6 افراد شہید جبکہ 17 افراد زخمی ہوگئے۔

سٹی 42 ٹی وی کے مطابق امن کے دشمنوں نے ایک بار پھر لاہور کو لہو لہو کردیا۔ بیدیاں روڈ پر مردم شماری کی ویگن پر خود کش حملہ ہوا جس کے نتیجے میں 4 فوجی جوانوں سمیت 6 افراد شہید جبکہ 17 افراد زخمی ہوگئے، دھماکے سے قریب کھڑی گاڑیوں کو بھی شدید نقصان پہنچا۔ حادثے کی اطلاع ملنے پر بم سکواڈ، ریسیکیو ٹیمیں اور پولیس اہلکار موقع پر پہنچ گئے ہیں۔ حادثے میں زخمی ہونے والے افراد کو طبی امداد کیلئے ہسپتال منتقل کردیا گیا۔ سیکیورٹی فورسز اور پولیس اہلکاروں کی بھاری نفری نے علاقے کو گھیرے میں لے کر شواہد اکٹھے کرکے تحقیقات شروع کردی ہیں۔

عینی شاہدین کے مطابق دھمکاکہ اس قدر شدید تھا کہ اس سے قریبی عمارتوں کے شیشے بھی ٹوٹ گئے۔

شہید ہونے والوں میں 35 سالہ پاک فضائیہ کا جوان محمد اویس، فوجی جوان 33 سالہ محمد ساجد، محمدعبداللہ ، 77سالہ محمد بوٹا اور 30 سالہ سیف شامل ہیں۔ زخمیوں میں 14 سالہ رحمان، 30 سالہ شکیل، 6 ماہ کا بچہ احسان، 33 سالہ دل باز، الطاف، شمشاد، اسلم، ماجد، ارشاد، جمیل، 30 سالہ افضل، 42 سالہ فیاض احمد، 30 سالہ محمد فاروق،16 سالہ فرحان،40 سالہ اسلم ، گلزار، 45 سالہ عثمان،22 سالہ ارشد، 25 سالہ تہمینہ اور 16 سالہ عابد بھی دھماکے میں زخمی ہوئے۔

ذرائع کے مطابق موٹر سائیکل سوار حملہ آور نے مردم شماری کی ٹیم کی گاڑی کے قریب آکر خود کو دھماکے سے اڑایا، سی سی ٹی وی کیمروں کی مدد سے حملہ آور کی شناخت کی جارہی ہے، حملہ آور کے جائے وقوع سے اعضاء مل گئے ہیں۔ قانون نافذ کرنے والے اداروں کا کہنا ہے کہ خود کش حملہ آور کی عمر 16 سے 18 سال ہے جبکہ دھماکے میں 8 سے 10 کلو بارودی مواد اور بال بیئرنگ بھی استعمال کیے گئے ہیں۔ source... http://city42.tv/top-stories/2017/04/05/suicide-blast-bedian-road-6-persons-martyred-including-4-soldiers-17-persons-injured/