بستی ملوک ملتان کے 7 سالہ اورنگزیب کو محلے کی لڑائی میں نامزد ملزم قرار دے کر مجرمانہ الزامات کے تحت مقدمے میں نامزد کیا گیا اور اس "مطلوب ترین" ملزم کی فوری گرفتاری عمل میں لائی گئی۔ ملزم کے چھوٹے چھوٹے ہاتھوں میں قانون کی زنجیریں (ہتھکڑیاں) پہنا کر اسے مجسٹریٹ کی عدالت میں پیش کیا گیا۔ مگر پولیس کی اس نام نہاد "بروقتی" سے اختلاف کرتے ہوئے منصف نے کم عمر بچے کو رہا کرنے اور پرچے کے اخراج کا حکم دے دیا، اور یوں روتی ماں کو تسکین ہوئی۔ اب آگے ان مظلوم ماں بیٹے کے ساتھ انصاف ہوگا یا نہیں؟ جھوٹی اور غیر قانونی ایف آئی آر درج کرنے والوں سے جوابدہی ہوگی یا نہیں؟ اس بارے میں وقت ہی بتائے گا۔ سوشل میڈیا پر روتی ماں اور معصوم بچے کی ہتھکڑی لگی تصویر نے دل بہت دکھی کر دیا۔ بستی ملوک کے ہتھکڑی لگے 7 سالہ اورنگ زیب نے مجھے عشروں قبل تھانہ چوک اعظم کے ایک معصوم حوالاتی کی یاد دلا دی۔۔ یہ ذکر ہے اس زمانے کا جب آتش جوان تھا اور چغل خور سوشل میڈیا نے ابھی جنم نہیں لیا تھا۔ تب پرنٹ میڈیا زیادہ متحرک، فعال اور بااعتماد تھا اور اخبارات میں چھپنے والی چند سطری خبر بھی قابلِ مواخذہ ہوتی تھی۔ صحافت بھی باوقار تھی اور صحافی بھی قابلِ اعتماد۔مجھے یاد ہے ان دنوں شاید موبائل تو تھا مگر ٹچ اسکرین کے بغیر۔ اس لیے فیلڈ میں تصویریں بنانے والا پریس فوٹوگرافر، خبریں تلاش کرنے اور لکھنے والے رپورٹر سے زیادہ بااثر ہوتا تھا۔" بات ہو رہی تھی تھانہ چوک اعظم کے معصوم حوالاتی کی۔ صبح صبح ہمیں پتہ چلا کہ پولیس تھانہ چوک اعظم نے رات سے کسی بچے کو بٹھایا ہوا ہے۔ اس کی باقاعدہ گرفتاری (بندی) ڈالے بغیر ہی اسے رکھا گیا تھا۔ ہم نے ملک مقبول الٰہی کو ساتھ لیا، جو ان دنوں بھی روزنامہ 'خبریں' سے ہی منسلک تھے، اور تھانہ چوک اعظم پہنچ گئے۔ان دنوں چوک اعظم تھانہ، لیہ روڈ پر واقع پرانی بلڈنگ میں ہوا کرتا تھا۔ تھانے کے انچارج ایک سینئر پولیس آفیسر تھے۔ ان کا نام تو یاد ہے مگر اب چونکہ وہ یقیناً ریٹائرڈ ہو چکے ہوں گے، اس لیے اچھا نہیں لگتا کہ ان کا نام لکھا جائے، اور نام لکھنا ضروری بھی نہیں کیونکہ اہمیت تو منصب کی ہوتی ہے، نام کی نہیں۔۔ لیہ سے چوک اعظم کا سفر پون گھنٹے کا تو ہے۔ جب ہم تھانے پہنچے تو صبح کے سات یا آٹھ بجے کا وقت ہو گا۔ تھانے کا گیٹ کھلا تھا۔ ہمیں سامنے صحن میں کوئی نظر نہیں آیا، سوائے حوالات میں قید ایک چھوٹے سے معصوم بچے کے۔دل تو چاہا کہ حوالاتی سے ملاقات کر لی جائے، مگر خواہش کے باوجود ہم نے حوالاتی سے ملنے کی بجائے محرر کے کمرے میں جا کر اپنی آمد اور مقصد کی اجازت حاصل کرنا ضروری سمجھا۔ طریقہ کار بھی یہی ہے کہ اگر آپ کسی بھی سرکاری یا غیر سرکاری ادارے میں اپنے صحافتی فرض کی ادائیگی کے لیے جاتے ہیں، تو متعلقہ آفس کو ضرور انفارم کریں۔ چھوٹے سے کمرے میں ڈیوٹی محرر موجود تھے۔ استفسار پر پتا چلا کہ تھانیدار صاحب رات کو گشت پر تھے، اس لیے ابھی آفس نہیں آئے۔ ہم نے پوچھا کہ حوالات میں جو ملزم ہے، اسے کس جرم میں گرفتار کیا گیا ہے اور اس کی ایف آئی آر (FIR) کا نمبر کیا ہے؟ پتا چلا کہ ملزم کے خلاف نہ کوئی درخواست تھی اور نہ ہی کوئی ایف آئی آر۔ مطلب تھانے والوں نے اس معصوم کو ناجائز حوالات میں ڈالا ہوا تھا۔ہم نے محرر صاحب سے استفسار کیا کہ اس بچے کو کس نے بغیر روانگی (یا بلاموجب) حوالات میں بند کیا ہوا ہے؟ ان کا جواب نفی میں تھا، انہوں نے کہا، 'مجھے نہیں پتا اسے کون لایا ہے۔' 'یہ کیس تو حبسِ بے جا کا ہے سر جی۔' تصدیق ہو جانے کے بعد ہم نے محرر صاحب سے گزارش کی۔یہ کہہ کر ہم محبوس بچے سے ملاقات کے لیے آفس سے باہر نکل آئے۔ بچے سے پوچھا کہ اسے کون یہاں لایا ہے؟ 'انکل سپاہی لائے تھے،' بچے کا جواب تھا۔ اسے بھی اس مہربان کے نام کا پتا نہیں تھا۔ ہماری ملاقات جاری ہی تھی کہ محرر صاحب نے آکر ہمیں بتایا، 'ایس ایچ او صاحب دفتر میں آپ کے منتظر ہیں۔' چائے بسکٹ کے ساتھ صاحب نے ہماری ساری بات سنی۔ بات سننے کے بعد، معصوم بچے کو اندر (حوالات) کرنے والے نامعلوم اہلکار کو بھاری ..... نکالتے ہوئے، انہوں نے بچے کو فوری طور پر رہا کرنے کا حکم دیا۔ بچے کو بھی چائے پلائی گئی اور بسکٹ کھلائے گئے۔ اگلے دن یہ خبر اخبارات میں نمایاں تھی اور اس پر ایس پی آفس نے نوٹس بھی لے لیا۔ اب بستی ملوک کے 7 سالہ بے گناہ اورنگزیب کو 'مہمان' بنانے اور ہتھکڑی لگانے والے مہربانوں کے خلاف کیا کارروائی ہوئی؟ اس کا پتا چلنا ابھی باقی ہے۔عام آدمی کو ہمیشہ پولیس کی طرف سے بروقت کارروائی نہ ہونے اور بروقت سہلِ انصاف نہ ملنے کا گلہ ہوتا ہے... لیکن اورنگزیب کیس نے اس تاثر کی نفی کی ہے۔ پولیس اورنگزیب جیسے قانون شکنوں کے لیے ہر دم تیار، ہر دم مستعد ہے , اب مسئلہ منصفوں کا ہے۔ کہتے ہیں انصاف اندھا ہوتا ہے، لیکن لگتا ہے اب منصف دیکھنے لگے ہیں..."

انجم صحرائی مستقل کالم ۔۔ بلا مبالغہ