ایمرسن یونیورسٹی ملتان میں کتاب "ہیروشیما کے آنسو” کی تقریبِ پذیرائی منعقد

شعبۂ اردو، ایمرسن یونیورسٹی ملتان کے زیرِ اہتمام امریکہ میں مقیم معروف ادیبہ محترمہ بینا گوئندی کی تازہ تصنیف ہیروشیما کے آنسو" کی تقریبِ پذیرائی سیمینار ہال میں منعقد ہوئی۔ تقریب میں اساتذہ، طلبہ اور ادب سے وابستہ شخصیات کی کثیر تعداد نے شرکت کی۔تقریب کے مہمانِ خصوصی کمشنر ملتان ڈویژن جناب عامر کریم خاں تھے، جبکہ صدارت کے فرائض رجسٹرار ایمرسن یونیورسٹی ملتان ڈاکٹر محمد فاروق نے انجام دیے۔ اپنے خطاب میں مہمانِ خصوصی نے کہا کہ ادب معاشرے کی فکری تشکیل میں بنیادی کردار ادا کرتا ہے اور ایسے موضوعات پر لکھی جانے والی کتب انسانیت، امن اور عالمی شعور کو فروغ دیتی ہیں۔تقریب میں پروفیسر نسیم شاہد، جناب شاکر حسین شاکر، ڈاکٹر سجاد نعیم، ڈاکٹر سامیہ کومل، ڈاکٹر ہارون خورشید پاشا اور صائمہ نورین بخاری نے کتاب کے مختلف پہلوؤں پر سیر حاصل گفتگو کی۔ مقررین نے کہا کہ "ہیروشیما کے آنسو" جنگ کی ہولناکیوں اور انسانی المیے کو مؤثر اسلوب میں پیش کرتی ہے اور قاری کو امن، رواداری اور انسان دوستی کا پیغام دیتی ہے۔صدرِ تقریب ڈاکٹر محمد فاروق نے اپنے صدارتی کلمات میں شعبۂ اردو کی علمی و ادبی سرگرمیوں کو سراہتے ہوئے کہا کہ اس نوعیت کی تقاریب علمی ماحول کو تقویت دیتی اور طلبہ میں مطالعے کا رجحان بڑھاتی ہیں۔تقریب کے اختتام پر مہمانِ خصوصی کو یادگاری شیلڈ پیش کی گئی اور شرکاء نے کتاب کی مصنفہ کی علمی خدمات کو خراجِ تحسین پیش کیا۔