ماں کشمیر تو جنت ہے ناں، جنت میں طوفان ہے کیوں؟ یوم یکجہتی کشمیر پر سیمینار کا انعقاد

لیہ،( صبح پاکستان ) ماں کشمیر تو جنت ہے ناں، جنت میں طوفان ہے کیوں؟ یوم یکجہتی کشمیر پر ڈی پی ایس گرلز ونگ میں سیمینار کا انعقاد کیا گیا۔ ڈپٹی کمشنر آصف علی ڈوگر سیمینار کے مہمان خصوصی تھے۔ ڈسٹرکٹ پولیس آفیسر حسن جاوید نے سیمینار میں خصوصی شرکت کی۔ ایڈیشنل ڈپٹی کمشنر جنرل شبیر احمد ڈوگر، اے سی زوہیب کریم اور ضلعی سربراہان، ڈی پی ایس پرنسپلز طاہرہ ذوالفقار، اکرم جاوید، اساتذہ، طلبہ اور میڈیا نمائندگان بھی سیمینار میں شریک ہوئے۔ طلبہ کی طرف سے کشمیری بہن بھائیوں سے اظہار یکجتی کے لئے تقاریر، ٹیبلوز اور خاکے پیش کئے گئے۔ ٹیبلوز اور خاکوں میں بھارتی فوج کے جبر اور کشمیریوں کے حوصلہ، جذبہ حریت کے مناظر کی جذباتی عکاسی شاندار انداز میں کی گئی۔ ڈپٹی کمشنر نے گرلز ونگ کی طالبات کی یکجہتی کشمیر کے موضوع پر بنائی گئی پینٹنگز کا بھی معائنہ کیا۔ سیمینار کے دوران یکجہتی کشمیر کے سلسلہ میں ایک منٹ کی خاموشی اختیار کی گئی۔ ڈپٹی کمشنر آصف علی ڈوگر نے سیمینار سے خطاب کرتے ہوئے کہا کہ کشمیر کی آزادی نوشتہ دیوار ہے۔ ہماری اخلاقی، انسانی، سفارتی اور اصولی وابستگی کشمیری بہن بھائیوں کے ساتھ ہے۔ ڈپٹی کمشنر نے کہا کہ پانچ فروری صرف ایک تاریخ نہیں بلکہ کشمیری عوام کے ساتھ کھڑے ہونے کا ایک پیغام ہے۔ کشمیری بہن بھائی دہائیوں سے اپنے حقوق، آزادی اور شناخت کے لیے جدوجہد کر رہے ہیں۔ مقبوضہ کشمیر میں انسانی حقوق اور حق خود ارادیت کو جبر سے روندا جا رہا ہے۔ انہوں نے کہا کہ اقوام متحدہ کی ذمہ داری بنتی ہے کہ وہ انسانی حقوق کے تحفظ اور دیرپا امن کے قیام کے لیے مؤثر کردار ادا کرے۔ ڈپٹی کمشنر نے کہا کہ جنوبی ایشیا کے عوام کی خوشحالی، ترقی اور استحکام اسی وقت ممکن ہے جب بھارت اپنی ہٹ دھرم چھوڑ کر تنازعات کو بات چیت، سفارتکاری اور انصاف کے اصولوں کے تحت حل کرنے کے لئے تشدد کے بجائے امن کی میز کی طرف آئے۔ انہوں نے کہا کہ ہم انصاف، امن اور انسانی وقار کے اصولوں پر قائم رہتے ہوئے مظلوم کشمیری بہن بھائیوں کے ساتھ کھڑے رہیں گے۔ سیمینار سے پرنسپل ڈی پی ایس بوائز ونگ اکرم جاوید نے بھی خطاب کیا۔ ڈپٹی کمشنر اور ڈی پی او لیہ نے اس موقع پر پینٹنگز بنانے والی طالبات میں سرٹیفکیٹ بھی تقسیم کئے۔ بعد ازاں ڈی پی ایس سے کشمیر چوک تک ریلی نکالی گئی۔ ڈپٹی کمشنر آصف علی ڈوگر اور ڈی پی او حسن جاوید نے ریلی کی قیادت کی۔ شرکاء ریلی نے کشمیریوں سے اظہارِ یکجہتی کے لئے پلے کارڈ، پینا فلیکس اٹھائے ہوئے تھے۔ شرکاء نے کشمیر کی آزادی کے حق میں نعرے لگائے۔ یوم یکجہتی کشمیر کے سلسلہ میں تحصیل سطح پر بھی ریلیوں کا انعقاد کیا گیا۔