Tag: layyah news

لیہ (پ ر)ڈسٹرکٹ پریس کلب لیہ میں ڈسٹرکٹ پریس کلب، انجمن صحافیان، ایمرا کے صدور و سیکرٹریز، گورننگ باڈی اور مجلس عاملہ کے چیئرمین و وائس چیئرمین کا مشترکہ اجلاس منعقد ہوا۔ نئی منتخب باڈی کے چارج سنبھالنے کے بعد یہ پہلا باضابطہ اجلاس تھا۔ اجلاس کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔ بعد ازاں ایجنڈے کے مطابق آڈیٹوریم کے قیام، تزئین و آرائش کی منصوبہ بندی، مستقبل میں صحافیوں کی فلاح و بہبود کے لیے مختلف تجاویز، ٹیبل آئٹمز اور دیگر ضروری امور پر تفصیلی غور و خوض کیا گیا۔ اجلاس کی صدارت صدر ڈسٹرکٹ پریس کلب محسن عدیل چوہدری نے کی جبکہ کنوینئر جنرل سیکرٹری رانا خالد محمود شوق تھے۔ اجلاس میں متفقہ طور پر فیصلہ کیا گیا کہ ڈسٹرکٹ پریس کلب کے موجودہ ہال کو جدید سمعی و بصری آلات سے آراستہ ملٹی پرپز آڈیٹوریم میں تبدیل کیا جائے گا، جو ضلع لیہ کا پہلا جدید آڈیٹوریم ہوگا۔ اس آڈیٹوریم میں نہ صرف پریس کلب کی تقریبات بلکہ علمی ادبی سیاسی سرگرمیوں کی ترویج و احیاء کے لیے عوام کو سہولت حاصل ہوگی جس میں سرکاری و غیر سرکاری سیمینارز، پریس کانفرنسز، آگاہی سیشنز، تربیتی پروگرامز، ثقافتی و مذہبی تقریبات بھی منعقد کی جا سکیں گی۔آڈیٹوریم کی تعمیر کے حوالے سے رانا خالد محمود شوق، تنویر احمد خان، فرید اللہ چوہدری، مرزا گلزار بیگ، محمد یعقوب مرزا، اظہر زیدی، مہر کامران تھند، سید عمران علی شاہ، ملک فیض بھلر اور دیگر عہدیداران نے تجاویز پیش کیں، جنہیں اجلاس میں متفقہ طور پر منظور کر لیا گیا۔ اس موقع پر خطاب کرتے ہوئے صدر ڈسٹرکٹ پریس کلب محسن عدیل چوہدری نے کہا: “صحافی معاشرے کی آنکھ اور آواز ہیں، انہیں درپیش مسائل کے فوری اور مؤثر حل کے لیے ہم ہر وقت موجود ہیں۔ ڈسٹرکٹ پریس کلب نہ صرف پرنٹ، الیکٹرانک اور سوشل میڈیا کے ذریعے عوامی فلاح و بہبود کے امور پر آگاہی فراہم کر رہا ہے بلکہ ضلع لیہ کے مسائل بھی اعلیٰ حکام اور حکمرانوں تک پہنچا رہا ہے۔ ضلع بھر کے صحافیوں کا مثبت، تعمیری اور ذمہ دارانہ کردار قابلِ تحسین ہے۔” انہوں نے مزید کہا کہ ملٹی پرپز آڈیٹوریم کی تکمیل ضلع لیہ کے لیے ایک شاندار اور دیرپا اثاثہ ثابت ہوگی، جہاں ون ونڈو بنیاد پر مختلف تقریبات، تربیتی سیشنز اور آگاہی پروگرامز منعقد کیے جا سکیں گے۔جنرل سیکرٹری رانا خالد محمود شوق نے اپنے خطاب میں کہا “ڈسٹرکٹ پریس کلب کو جدید تقاضوں سے ہم آہنگ کرنا ہماری ترجیح ہے۔ آڈیٹوریم کا قیام صحافی برادری کے ساتھ ساتھ پورے ضلع کے لیے ایک بڑی سہولت ہوگا۔ ہم صحافیوں کی فلاح، تحفظ اور عزتِ نفس کے لیے ہر ممکن اقدامات جاری رکھیں گے۔اجلاس میں گزشتہ دنوں فائرنگ کے افسوسناک واقعہ میں صحافی شہزاد گجر کے جاں بحق ہونے پر گہرے دکھ اور افسوس کا اظہار کیا گیا اور مرحوم کے درجات کی بلندی کے لیے دعا کی گئی۔ صدر محسن عدیل چوہدری نے اجلاس کو آگاہ کیا کہ وہ اور جنرل سیکرٹری رانا خالد محمود شوق لمحہ بہ لمحہ پولیس اور متعلقہ حکام سے رابطے میں ہیں اور متاثرہ خاندان کو انصاف دلانے کے لیے بھرپور کردار ادا کر رہے ہیں۔