لیہ ۔سپیشل سیکرٹری صحت و آبادی جنوبی پنجاب شہباز نقوی کا ڈسٹرکٹ ہیڈکوارٹر اور تحصیل ہیڈکوارٹر ہسپتال کوٹ سلطان کا اچانک دورہ

لیہ( صبح پا کستان )سپیشل سیکرٹری صحت و آبادی جنوبی پنجاب ملتان شہباز نقوی ڈسٹرکٹ ہیڈکوارٹر ہسپتال لیہ اور تحصیل ہیڈکوارٹر ہسپتال کوٹ سلطان کا دورہ کیا جہاں انہوں نے طبی سہولیات، صفائی ستھرائی، ادویات کی دستیابی، مریضوں کو فراہم کی جانے والی سہولیات اور انتظامی امور کا تفصیلی جائزہ لیا۔اس موقع پر سپیشل سیکرٹری صحت شہباز نقوی نے مریضوں سے علاج معالجہ، ہسپتالوں میں دستیاب طبی سہولیات، ادویات کی فراہمی اور طبی عملہ کے رویے بارے دریافت کیا۔اس موقع پر سپیشل سیکرٹری صحت شہباز نقوی نے کہا کہ وزیراعلیٰ پنجاب مریم نواز شریف شعبہ صحت میں انقلابی اقدامات کے ذریعے عوام کو جدید، معیاری اور آسان طبی سہولیات کی فراہمی کے لیے بھرپور اقدامات کر رہی ہیں اور حکومت پنجاب کا وژن ہے کہ شہریوں کو ان کی دہلیز پر بہترین طبی سہولیات میسر آئیں۔ انہوں نے ہدایت کی کہ ہسپتالوں میں صفائی ستھرائی کے معیار کو مزید بہتر بنایا جائے، ادویات کی دستیابی یقینی بنائی جائے اور مریضوں کی سہولت کے لیے تمام انتظامات کو مزید مؤثر بنایا جائے۔انہوں نے متعلقہ افسران کو ہدایت کی کہ مریضوں کو مقررہ ایس او پیز کے مطابق معیاری طبی سہولیات، بروقت علاج اور ادویات کی بلا تعطل فراہمی ہر صورت یقینی بنائی جائے۔ انہوں نے کہا کہ ڈاکٹرز، پیرا میڈیکل سٹاف اور دیگر طبی عملہ خدمت خلق کے جذبہ کے تحت اپنی ذمہ داریاں ادا کرے اور مریضوں کو سہولت، احترام اور بہترین طبی ماحول کی فراہمی پر خصوصی توجہ دی جائے۔دریں اثناڈسٹرکٹ ہیڈکوارٹر ڈینٹل کالج لیہ میں قائم سکول آف مڈوائفری کے قیام و فعالیت کے انتظامات کا جائزہ لیتے ہوئے طالبات کے لیے رہائشی سہولیات اور دیگر ضروری انتظامات جلد مکمل کرنے کی ہدایات جاری کی تاکہ ادارہ جلد فعال ہو کر شعبہ صحت میں تربیت یافتہ افرادی قوت کی تیاری میں مؤثر کردار ادا کر سکے۔