لیہ .”جیوے جیوے پاکستان، راج دلارا پاکستان”پا کستان کی امن کو ششوں کو سلام ۔ یوم تشکر ریلی

لیہ {صبح پا کستان }"جیوے جیوے پاکستان، راج دلارا پاکستان" پاکستان کی امن کی سفارتکاری کا عالمی اعتراف۔ مشرق وسطیٰ میں جنگ بندی کے تاریخی کردار پر پاکستان کو خراج تحسین پیش۔ ضلعی انتظامیہ کے زیر اہتمام مشرق وسطیٰ میں کشیدگی کے خاتمے اور جنگ بندی کے قیام میں پاکستان کے مؤثر اور ذمہ دارانہ سفارتی کردار کو عالمی سطح پر تسلیم کیے جانے پر یوم تشکر منایا گیا اور تشکر ریلی نکالی گئی۔ اس سلسلے میں ٹی ڈی اے چوک سے کشمیر چوک تک ایک پرُجوش اور پُرامن ریلی نکالی گئی۔ریلی کی قیادت اسسٹنٹ کمشنر لیہ زوہیب کریم نے کی۔ یوم تشکر ریلی میں چیف ایگزیکٹو آفیسر تعلیم ڈاکٹر محمد قیوم خان، ایس ڈی ای او پیرا ام حبیبہ، ڈپٹی ڈائریکٹر کالجز ذوالفقار علی حیدری، ڈپٹی ڈائریکٹر تعلقات عامہ نثار احمد خان، سابق پرنسپل ڈاکٹر ظفر عالم ظفری، ڈی ای او تعلیم گل شیر، ڈاکٹر یونس کلیہ، صدر پریس کلب محسن عدیل چوہدری، سی او ضلع کونسل محمد فیصل، چیئرمین انجمن تاجران تنویر احمد خان، ریسکیو1122، سول ڈیفنس، پولیس اور ضلعی افسران، اساتذہ، طلبہ، سماجی و سیاسی، میڈیا نمائندگان اور مختلف مکاتب فکر سے تعلق رکھنے والے افراد شریک ہوئے۔ شرکاء نے پاکستان کے امن پسند کردار کو سراہتے ہوئے قومی یکجہتی اور استحکام کا اظہار کیا اور پاکستان زندہ باد کے نعرے لگائے۔ اسسٹنٹ کمشنر زوہیب کریم نے ریلی کے اختتام پر گفتگو کرتے ہوئے کہا کہ پاکستان نے مشرق وسطیٰ میں جنگ بندی کے لیے جس سفارتی بصیرت اور ذمہ داری کا مظاہرہ کیا وہ نہ صرف خطے بلکہ عالمی برادری کے لیے ایک مثبت پیغام ہے۔ انہوں نے کہا کہ پاکستان کا کردار ایک ایسے ریاستی وژن کی عکاسی کرتا ہے جو تنازعات کے حل کے لیے طاقت کے بجائے مکالمے اور سفارتکاری پر یقین رکھتا ہے۔ چیف ایگزیکٹو آفیسر تعلیم ڈاکٹر محمد قیوم خان نے کہا کہ دنیا بھر میں پاکستان کے اس کردار کا اعتراف کیا جا رہا ہے اور یہ بات ثابت ہو رہی ہے کہ پاکستان امن کے قیام میں ایک سنجیدہ، متحرک اور ذمہ دار ملک کے طور پر سامنے آیا ہے۔ پاکستان کا مؤقف ہمیشہ سے یہی رہا ہے کہ پاکستان کا پُرامن مؤقف خطے اور دنیا میں امن و استحکام کے فروغ کی عکاسی کرتا ہے۔ ضلع لیہ میں فتح پور ، چوبارہ اور کروڑ سمیت دیگر مقامات پر بھی ریلیاں نکالی گئیں