ڈیرہ غازیخان(صبح پا کستان)ڈیرہ غازیخان ڈویژن میں ممکنہ سیلاب کے پیش نظر انتظامی مشینری کو متحرک کر دیاگیا ہے . ضلعی سطح پر سیٹلائٹ انٹینا نصب کر کے موسمی صورتحال کو مانیٹر کیا جائے گا. ڈیرہ غازیخان او رراجن پو راضلاع کے پہاڑی علاقوں میں ریڈار سسٹم نصب کیے جائیں گے جس کیلئے ڈیرہ غازیخان کے علاقہ سخی سرور کے مقام کو ریڈار سسٹم کیلئے منتخب کر لیاگیاہے جبکہ راجن پو رمیں مناسب جگہ کی تلاش کیلئے ماہرین پر مشتمل سروے ٹیم جلد دورہ کرے گی .سیلاب سے پہلے فصلات ، آبادی سمیت دیگر املاک کا ریکارڈ مرتب کرنے کیلئے پی ڈی ایم اے کی ٹیموں نے لیہ او رمظفرگڑھ اضلاع میں سروے شروع کر دیا ہے جبکہ ڈیرہ اور راجن پو رمیں دوسرے مرحلے کے تحت جلد سروے کیا جائے گا. فصلات کی گرداوری کے بھی احکامات جاری کر دیئے گئے ہیں . یہ بات کمشنر ڈیرہ غازیخان ڈویژن احمد علی کمبوہ کی زیر صدارت اس سلسلے میں منعقدہ اجلاس میں بتائی گئی. اجلاس میں آر پی او رحمت اللہ نیازی، ڈ یرہ غازیخان ، راجن پو راور مظفرگڑھ کے ڈ پٹی کمشنرز بالترتیب اللہ رکھا انجم ، اشفاق احمد ، سیف الرحمن ، ڈائریکٹر لوکل گورنمنٹ اظہر حسین چانڈیہ ، ڈائریکٹرز سوشل ویلفیئر فاروق احمد ، ڈائریکٹر ہیلتھ سروسز ؍ سی ای او ڈاکٹر خلیل احمد ، ڈائریکٹر کالجز پروفیسر الطاف حسین ، ڈائریکٹر لائیو سٹاک ڈاکٹر اشرف انجم ، اسسٹنٹ کمشنر جنرل سیف الرحمن بلوانی ، ایس ای انہار شیخ فضل کریم سمیت متعلقہ محکموں کے افسران شریک تھے. کمشنر احمدعلی کمبوہ نے کہاکہ رودکوہیوں کے علاقوں میں 11جولائی سے بارشوں کی پیشگوئی کی گئی ہے رودکوہیوں کے چینلوں کی صفائی اور چناب اور سندھ کے دریاؤں کے فلڈ بند کی مرمت ، نشیبی علاقوں سے آبادی کے انخلاء اور تجاوزات کے خاتمہ کیلئے موثر کارروائی کی جائے . ڈپٹی کمشنرز متعلقہ امور کی براہ راست نگرانی کریں . کمشنر نے کہاکہ فلڈ بند ، سپرز اور سٹڈز کی تعمیر سمیت سیلابی پانی کی محفوظ نکاسی کے ترقیاتی منصوبے بروقت مکمل کیے جائیں . اجلاس میں بتایا گیاکہ پی ڈی ایم اے تین کیٹیگری پر مشتمل علاقوں کا سروے کر رہی ہے دریا سے تین کلو میٹر تک کے علاقے کو ہائی فلڈ رسک ڈیکلیئر کرتے ہوئے گھر گھر جا کر افراد کی تعداد ، معاشی حالت کمروں کی تعداد سمیت دیگر تمام ضروری ریکارڈ جی پی ایس سسٹم کے ذریعے مرتب کر رہی ہے . اجلاس میں بتایاگیاکہ ممکنہ سیلاب کے پیش نظر ڈیرہ غازیخان ڈویژن میں آبادیوں کے انخلاء ، ریلیف کیمپس کے قیام ، ویکسی نیشن ، ادویات اور خوراک کی فراہمی سمیت دیگر تمام ضروری اقدامات مکمل کر لیے گئے ہیں . ڈیوٹی روسٹرز جاری کر نے کے ساتھ ساتھ کنٹرول رومز فنکشنل کر دیئے گئے ہیں .