لیہ، ( صبح پا کستان ) ڈپٹی کمشنر/ ڈسٹرکٹ کلکٹر کے دفتر سے جاری ہونے والے مراسلہ کے مطابق ضلع لیہ میں مالی سال 2026-27 کے لیے ویلویشن ٹیبل کی تیاری کا عمل شروع کر دیا گیا ہے۔ ریونیو افسر، گرداور، پٹواری اراضیات کی خرید وفروخت دوران سال رواں کو مدنظر رکھتے ہوئے سال 2026.27 کے لئے قسم زمین اور لوکیشن کے حوالہ سے اوسط بیعہ کی بنیاد پر نئے ریٹ کا تعین کر کے بذریعہ لاگ ان ایڈ کرے گا تاکہ عملہ کی تجاویز کی روشنی میں اراضیات کے نئے نرخ مقرر کئے جا سکیں۔ اس سلسلے میں ڈسٹرکٹ کلکٹر لیہ کی جانب سے عوامی اطلاع جاری کرتے ہوئے بتایا گیا ہے کہ تمام مالکانِ اراضی، کاشتکار اور متعلقہ افراد اپنے ریکارڈ کی درستگی اور اندراجات کی تصدیق 20 جون تک یقینی بنائیں۔ مراسلہ کے مطابق ایسے مالکانِ اراضی جنہوں نے گزشتہ برسوں میں زمین خریدی یا فروخت کی ہو، سال 2026-27 کے لیے خسرہ گرداوری کے عمل میں اپنے اندراجات کی تصدیق کروا لیں تاکہ بعد ازاں کسی قسم کی دشواری کا سامنا نہ کرنا پڑے۔ عوام کو ہدایت کی گئی ہے کہ انتقالات، رجسٹریوں اور دیگر متعلقہ دستاویزات کے ساتھ پٹوار خانہ یا متعلقہ ریونیو افسر سے رابطہ کریں۔ مزید کہا گیا ہے کہ اراضی ریکارڈ کی درستگی سے نہ صرف ملکیتی حقوق کا تحفظ ممکن ہوگا بلکہ سرکاری ریکارڈ کو بھی اپ ڈیٹ رکھنے میں مدد ملے گی۔ شہریوں سے اپیل کی گئی ہے کہ مقررہ مدت کے اندر اپنے کوائف کی جانچ پڑتال مکمل کریں اور کسی بھی اعتراض یا غلط اندراج کی صورت میں بروقت نشاندہی کریں۔