ملتان ۔ پنجاب لیگل ایڈ ایجنسی کے پلیٹ فارم سے مستحق افراد کو مکمل قانونی معاونت کی فراہمی یقینی بنائی جاءے ۔ سیکرٹری پراسیکیوشن پنجاب سلمان غنی

ملتان ( صبح پا کستان)سیکرٹری پراسیکیوشن پنجاب سلمان غنی نے ڈسٹرکٹ پراسیکیوشن آفس ملتان کا دورہ کیا جہاں انہوں نے افسران سے تفصیلی ملاقات کی اور محکمانہ امور، کارکردگی اور درپیش مسائل کا جائزہ لیا۔ اس موقع پر ڈسٹرکٹ پراسیکیوٹر ملتان امتیاز رسول چیمہ نے سیکرٹری پراسیکیوشن کو ضلع میں محکمہ کی مجموعی کارکردگی، زیر التوا مقدمات، سہولیات اور جاری اقدامات کے حوالے سے تفصیلی بریفنگ دی۔ سیکرٹری پراسیکیوشن سلمان غنی نے کہا کہ وزیراعلیٰ پنجاب مریم نواز شریف کے ویژن کے مطابق عوام کو بروقت اور معیاری انصاف کی فراہمی حکومت پنجاب کی اولین ترجیح ہے۔ انہوں نے کہا کہ حکومت پنجاب مستحق اور نادار افراد کو مفت قانونی معاونت کی فراہمی کے لیے بھی بھرپور اقدامات کر رہی ہے تاکہ ہر شہری کو انصاف تک مساوی رسائی حاصل ہو سکے۔ انہوں نے ہدایت کی کہ پنجاب لیگل ایڈ ایجنسی کے پلیٹ فارم سے فوجداری اور فیملی نوعیت کے مقدمات میں مستحق افراد کو مکمل قانونی معاونت کی فراہمی یقینی بنائی جائے تاکہ کوئی بھی شہری مالی مشکلات کے باعث قانونی حق سے محروم نہ رہے۔ انہوں نے کہا کہ پراسیکیوشن کے نظام کو مزید مؤثر، فعال اور جدید تقاضوں سے ہم آہنگ بنانے کے لیے مختلف اصلاحاتی اقدامات جاری ہیں۔ صوبہ بھر میں پراسیکیوشن دفاتر، انفراسٹرکچر اور دستیاب سہولیات کی بہتری کے لیے بھی عملی اقدامات کیے جا رہے ہیں۔دورے کے اختتام پر سیکرٹری پراسیکیوشن نے افسران کی کارکردگی کو سراہتے ہوئے عوام کو فوری اور مؤثر انصاف کی فراہمی کے لیے اپنی ذمہ داریاں مزید محنت اور لگن سے انجام دینے کی ہدایت کی۔