لیہ، محرم الحرام کے دوران امن و امان کے قیام اور فول پروف سکیورٹی انتظامات کو یقینی بنانے کے لیے ضلعی انتظامیہ متحرک

لیہ، ( صبح پا کستان ) ضلع میں محرم الحرام کے دوران امن و امان کے قیام اور فول پروف سکیورٹی انتظامات کو یقینی بنانے کے لیے ضلعی انتظامیہ متحرک ہو گئی۔ اس سلسلے میں ڈپٹی کمشنر آصف علی ڈوگر کی زیر صدارت کمیٹی روم میں عشرہ محرم الحرام کے سکیورٹی اور انتظامی امور کا جائزہ اجلاس منعقد ہوا۔ اجلاس میں ایس پی انویسٹی گیشن ملک شاہد، ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنرز، ڈی ایس پیز اور متعلقہ محکموں کے افسران نے شرکت کی۔ ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ محرم الحرام کے دوران امن و امان کے مثالی قیام کے لیے تمام ادارے باہمی رابطے اور مؤثر کوآرڈینیشن کے ساتھ اپنی ذمہ داریاں انجام دیں اور فول پروف انتظامات کو یقینی بنایا جائے۔ انہوں نے کہا کہ ضلعی کنٹرول روم میں تمام متعلقہ محکموں کے فوکل پرسنز چوبیس گھنٹے خدمات سرانجام دیں گے، جبکہ محکمہ صحت، ریسکیو 1122، سول ڈیفنس، ضلع کونسل، میونسپل کمیٹیاں، ستھرا پنجاب ایجنسی اور دیگر ادارے کنٹیجنسی پلان پر مکمل عملدرآمد کریں گے۔ ڈپٹی کمشنر نے ہدایت کی کہ جلوسوں اور مجالس کے راستوں پر صفائی ستھرائی، میونسپل سروسز، سڑکوں کے پیچ ورک اور سٹریٹ لائٹس کی مرمت بروقت مکمل کی جائے، جبکہ شہریوں کو ہر ممکن سہولیات کی فراہمی اور پرامن محرم الحرام کے انعقاد کے لیے کسی قسم کی کوتاہی برداشت نہیں کی جائے گی۔