لیہ، ( صبح پا کستان ) محرم الحرام کے دوران امن و امان کی صورتحال پر کڑی نظر رکھنے اور کسی بھی ہنگامی صورتحال سے مؤثر انداز میں نمٹنے کے لیے ضلعی کنٹرول روم کو فعال کر دیا گیا ہے، جہاں متعلقہ افسران اور اہلکار مختلف شفٹوں میں اپنے فرائض سرانجام دے رہے ہیں۔ ایڈیشنل ڈپٹی کمشنر جنرل شبیر احمد ڈوگر نے ضلعی کنٹرول روم کا دورہ کیا اور وہاں جاری انتظامات و ورکنگ کا تفصیلی جائزہ لیا۔ اس موقع پر کنٹرول روم انچارج کرامت چوہدری نے انہیں بریفنگ دیتے ہوئے کنٹرول روم کی کارکردگی، ڈیوٹی روسٹر اور مختلف اداروں کے ساتھ رابطہ کاری کے نظام سے آگاہ کیا۔ ایڈیشنل ڈپٹی کمشنر جنرل شبیر احمد ڈوگر نے ہدایت کی کہ محرم الحرام کے دوران امن و امان کے قیام اور کسی بھی ایمرجنسی صورتحال میں فوری ردعمل کو یقینی بنانے کے لیے کنٹرول روم کا عملہ مکمل مستعدی اور ذمہ داری کے ساتھ فرائض انجام دے۔ انہوں نے مزید ہدایت کی کہ ضلعی کنٹرول روم کا ہیلپ لائن نمبر 920016-0606 اور 5475317-0306 ہر وقت فعال رکھا جائے اور تمام متعلقہ محکموں کے ساتھ مؤثر رابطہ اور کوآرڈینیشن برقرار رکھی جائے تاکہ عوام کو بروقت سہولیات اور مدد فراہم کی جا سکے۔