ملتان . ریاست اپنی ذمہ داری نبھاتے ہوئے متاثرین سیلاب کی مکمل کفالت اور ان کے نقصانات کا ازالہ کرے گی۔ صوبائی وزیر رانا سکندر حیات

ملتان (صبح پاکستان ) صوبائی وزیر تعلیم و انچارج فلڈ آپریشن ملتان ڈویژن رانا سکندر حیات نے گزشتہ روز ملتان کے سیلاب سے متاثرہ علاقوں کا دورہ کیا اور فلڈ ریلیف سرگرمیوں کے حوالے سے تفصیلی بریفنگ لی۔ کمشنر ملتان عامر کریم خاں اور ڈپٹی کمشنر وسیم حامد سندھو نے صوبائی وزیر کو متاثرین کی بحالی اور ریلیف آپریشنز پر آگاہ کیا۔
وزیر تعلیم نے ہیڈ محمد والا بریچنگ سیکشن کا معائنہ کیا اور فلڈ کیمپس میں قائم سکول میں بچوں سے ملاقات کرکے ان میں تحائف تقسیم کیے۔ رانا سکندر حیات نے خیموں میں جا کر متاثرہ شہریوں کے مسائل بھی سنے اور انہیں مکمل تعاون کی یقین دہانی کرائی۔
انہوں نے کہا کہ وزیراعلیٰ پنجاب مریم نواز شریف کی ہدایت پر تاریخ کا سب سے بڑا ریسکیو آپریشن جاری ہے۔ وزیراعلیٰ خود متاثرہ علاقوں کا دورہ کرکے ریلیف سرگرمیوں کا جائزہ لے چکی ہیں۔ رانا سکندر حیات نے مزید کہا کہ انتظامیہ اور پولیس نے دن رات ایک کر کے ہزاروں خاندانوں کو محفوظ مقامات پر منتقل کیا۔ ریاست اپنی ذمہ داری نبھاتے ہوئے متاثرین کی مکمل کفالت کرے گی اور حکومت پنجاب ان کے نقصانات کا ازالہ کرے گی۔
کمشنر ملتان عامر کریم خاں نے بتایا کہ دریائے چناب میں سیلابی پانی کی سطح میں کمی واقع ہو رہی ہے جبکہ بستی جھگوں والا، اکبر بند، سکندری نالہ اور شیر شاہ بندوں کے قریب پانی کی سطح میں بھی کمی آئی ہے۔ انہوں نے کہا کہ ڈویژن بھر میں 93 فلڈ ریلیف کیمپس مکمل فعال ہیں اور وہاں تمام بنیادی سہولیات فراہم کی گئی ہیں۔ساڑھے 5 لاکھ سے زائد افراد اور 5 لاکھ سے زائد مویشی محفوظ مقامات پر منتقل کئے جاچکے ہیں۔
ڈپٹی کمشنر وسیم حامد سندھو نے کہا کہ بستی گاگراں کے زمیندارہ بند کے علاوہ کسی بند کے ٹوٹنے کی اطلاع موصول نہیں ہوئی۔ دریائے چناب کا سیلابی ریلا آئندہ 12 گھنٹوں میں مزید کم ہوگا۔ انہوں نے بتایا کہ عوامی مفاد میں تاحال ہیڈ محمد والا روڈ اور شیر شاہ بند کو بریچ کرنے کا فیصلہ نہیں کیا گیا، جبکہ ٹیکنیکل بریچنگ کمیٹی ہر دو گھنٹے بعد میٹنگ کر کے صورتحال کا جائزہ لے رہی ہے۔
دورے کے دوران ممبران صوبائی اسمبلی اقبال سراج، اسامہ فضل، آر پی او کیپٹن (ر) سہیل چوہدری اور سی پی او صادق ڈوگر بھی موجود تھے۔