لیہ(صبح پا کستان) ضلع کونسل لیہ نے 11کروڑ روپے ترقیاتی اخراجات کے تخمینہ سے کل آمدنی 19کروڑ 7لاکھ 16ہزار 668روپے جبکہ متوقع اخراجات 17کروڑ 92لاکھ 90ہزار 285روپے مالیت کاششماہی ٹیکس فری فاضل بجٹ منظور کیا ہے ۔بجٹ کی منظور ی کنونیئر وائس چیئرمین نور محبوب میلوانہ کی زیر صدارت اجلا س میں چیئرمین ضلع کونسل ملک عمر علی اولکھ کے بجٹ پیش کرنے پر دی گئی۔ششماہی بجٹ اجلاس میں ممبران محبوب الحسن سواگ ،جانی خان تنگوانی ،مہر احمد حسن کلاسرہ ،سلیم سبحان ،چودھری انعام الحق،جام منظور حسین ،طاہر سفیان ،اسلم ارشد خان سیہٹر ،محترمہ شگفتہ حسین ،یونس کنجال ،ڈاکٹر شہزاد گل ،ملک مقبول تھندنے مختلف مسائل جن میں نشیبی علاقوں میں دریا کے کٹاؤکے عمل کو روکنے ،شہریوں کو سہولیات فراہم کرنے، فوری فنڈز کی فراہمی ،یونین کونسلرز کے فنڈز میں اضافہ اور ایوان کو بطریق احسن چلانے، کسی بھی جماعت سے متاثر ہوئے بغیر مشترکہ کوششوں سے عوامی خدمت کو ترجیح دینے ،ضلع کی تعمیر وترقی کے لیے اپنا موثر کردار اداکرنے ایسے امور کے بارے میں آگاہی دی اور بحث میں حصہ لیا۔چیئرمین ملک عمر علی اولکھ نے بجٹ پیش کرتے ہوئے کہا کہ نئے نظام کے تحت ڈسٹرکٹ کونسل کا یہ ششماہی بجٹ تاریخ کو حصہ شمار ہوگا۔انہوں نے بجٹ کے تخمینہ جات بتاتے ہوئے کہا 11کروڑ روپے کے ترقیاتی اخراجات کے لیے مختص رقم سے متوقع آمد نی 190716668روپے جبکہ متوقع اخراجات 179290385روپے کے ساتھ ششماہی ٹیکس فری فاضل بجٹ پیش کیا جارہا ہے جس میں عوامی امنگوں کو مدنظر رکھتے ہوئے اخراجات کے تخمینہ لگائے گئے ہیں جن میں گاڑیوں ،جنریٹر،ٹریکٹرکی خرید کے لیے 55لاکھ روپے ،فرنیچر ،دفتر،ریسٹ ہاوس و ایوان کے لیے 12لاکھ روپے ،مرمت فرنیچر و گاڑیاں4لاکھ 30ہزار روپے ،پی او ایل و دفتری اخراجات کے لیے 34لاکھ 95ہزار روپے ،قدرتی آفات سے بچاؤکے فوری اقدامات کے لیے 9لاکھ روپے ،دیگر متفرق اخراجا ت کے لیے 8لاکھ 15ہزار روپے، اربن یونین کونسل کوٹ سلطان و متفرق یونین کونسل لدھانہ ،165ٹی ڈی اے ، سرشتہ تھل ،جمن شاہ ،شادو خان ،نواں کوٹ کے لیے 26لاکھ 50ہزار روپے مشینری وآلات کی خریدار ی کے لیے 14لاکھ 85ہزار روپے ،سپورٹ سرگرمیوں کے فروغ کے لیے 35لاکھ روپے ،یوتھ ویلفئیرکے لیے 25لاکھ روپے جبکہ لوکل گورنمنٹ بورڈ کی ادائیگی اور سیکورٹی آلات کے خریداری کے لیے 30لاکھ روپے مختص کرنے کی تجویز دی۔انہوں نے کہا کہ ضلع کونسل کے ممبران کی باہمی مشاورت و پنجاب حکومت کی ہدایت و رہنمائی کی روشنی میں شبانہ روز کوششو ں سے عوامی امنگوں و خواہشوں کی تکمیل کے لیے کوشاں رہیں گے اور ضلع کی خوشحالی و فلاح و بہبود کے حوالے سے یہ نیادورتاریخی ثابت ہوگا۔چیئرمین ضلع کونسل نے اپنے خطاب میں اس بات کا اعادہ کیا کہ نشیبی علاقوں کے لیے پروٹیکشن بند کی تعمیر ،تھل کینال ری ماڈلنگ،ایم ایم روڈ دورویہ سڑک کی تعمیرایسے میگا پراجیکٹ کے اجراء کے لیے ممبران اسمبلی کے تعاون سے کوششیں جاری رکھی جائیں گی۔تاکہ ضلع لیہ کو ترقی یافتہ اضلاع کی صف میں لاجاسکے۔قبل ازیں اجلاس عام میں ضلع کونسل لیہ کے بائی لازکی منظوری دی گئی ۔