لیہ( صبح پا کستان) ڈپٹی کمشنر لیہ آصف علی ڈوگر نے پنجاب ووکیشنل ٹریننگ کونسل کے زیر اہتمام منعقدہ ہنر روزگار میلہ میں بطور مہمان خصوصی شرکت کی۔ تقریب میں ڈسٹرکٹ بورڈ آف منیجمنٹ لیہ کے اراکین ڈاکٹر ظفر عالم ظفری، سید عمران علی شاہ، شکیلہ بانو، ووکیشنل ٹریننگ انسٹیٹیوٹس کے پرنسپلز نسیم اختر جکھڑ اور فاروق احمد سمیت مختلف شعبہ ہائے زندگی سے تعلق رکھنے والے افراد، اساتذہ، طلبہ و طالبات اور نجی اداروں کے نمائندگان نے شرکت کی۔ہنر روزگار میلہ میں پچاس سے زائد معروف ایمپلائر کمپنیوں نے شرکت کرتے ہوئے نوجوانوں کو روزگار کے مواقع فراہم کیے۔ کامیاب جاب فیئر کے نتیجہ میں ضلع لیہ سے ایک سو سے زائد جبکہ ووکیشنل ٹریننگ انسٹیٹیوٹس چوک اعظم اور فتح پور سے ساٹھ سے زائد طلبہ و طالبات مختلف اداروں میں ملازمتیں حاصل کرنے میں کامیاب ہوئے۔ڈپٹی کمشنر آصف علی ڈوگر نے میلہ کے بہترین انتظامات، جاب فیئر کی سرگرمیوں اور نوجوانوں کو روزگار کی فراہمی کے لیے کی جانے والی کاوشوں کو سراہا۔ انہوں نے مختلف سٹالز کا معائنہ کیا اور طلبہ و طالبات سے ملاقات کرتے ہوئے ان کی پیشہ ورانہ تربیت اور روزگار کے مواقع سے متعلق معلومات حاصل کیں۔ڈپٹی کمشنر آصف علی ڈوگر نے اس موقع پر خطاب کرتے ہوئے کہا کہ وزیراعلیٰ پنجاب مریم نواز شریف کی قیادت میں حکومت پنجاب نوجوانوں کو بااختیار بنانے، فنی تعلیم کے فروغ اور روزگار کے مواقع بڑھانے کے لیے گراں قدر اقدامات کر رہی ہے۔ انہوں نے کہا کہ فنی اور پیشہ ورانہ تعلیم موجودہ دور کی اہم ضرورت ہے جو نوجوانوں کو خود کفالت کی جانب گامزن کرتی ہے۔ ایسے پروگرام نہ صرف ہنر مند افرادی قوت کی تیاری میں معاون ثابت ہوتے ہیں بلکہ مقامی معیشت کے استحکام اور ترقی میں بھی اہم کردار ادا کرتے ہیں۔تقریب سے خطاب کرتے ہوئے دیگر مقررین نے پنجاب ووکیشنل ٹریننگ کونسل اور حکومت پنجاب کی جانب سے نوجوانوں کو ہنر مند بنانے اور انہیں باعزت روزگار کی فراہمی کے لیے اٹھائے گئے اقدامات کو سراہا۔ انہوں نے اس عزم کا اظہار کیا کہ مستقبل میں بھی ایسے پروگراموں کے ذریعے نوجوانوں کے لیے ترقی اور روزگار کے مزید مواقع پیدا کیے جاتے رہیں گے۔تقریب کی میزبانی کے فرائض سید عمران علی شاہ، وائس پریزیڈنٹ/ایگزیکٹو ممبر ڈسٹرکٹ بورڈ آف منیجمنٹ ووکیشنل ٹریننگ انسٹیٹیوٹس لیہ نے انجام دیے۔