چین پاکستان کا مشترکہ زرعی تحقیقی پروگرام پر اتفاق ،چاءینیز اکیڈمی آف ایگرکلچرل آف سا ءینسز کے وفد کا دورہ ملتان

ملتان (صبح پاکستان ) ترجمان محکمہ زراعت پنجاب کے مطابق چین کے زرعی ادارے چائنیز اکیڈمی آف ایگریکلچرل سائنسز(CAAS)کے اعلیٰ سطحی وفد نے کاٹن ریسرچ انسٹیٹیوٹ ملتان کا دورہ کیا۔ وفد میں مسٹر ڈیوڈ، ڈاکٹر شنگ اور مس چائی شامل تھے جبکہ پاکستان کی جانب سے ڈائریکٹر گرین پاکستان انیشیٹو بریگیڈیئر(ر) سہیل عشرت و دیگر پانچ اراکین نے نمائندگی کی۔اس موقع پروفد کو کاٹن ریسرچ انسٹیٹیوٹ ملتان کی تحقیقی سرگرمیوں اور اب تک کی نمایاں کامیابیوں کے بارے میں تفصیلی بریفنگ دی گئی۔ اجلاس کے دوران کپاس کی فصل کی موجودہ صورتحال درپیش مسائل جیسے وائرس کے کنٹرول اور کیڑوں (خصوصاً سفید مکھی، تیلے اور گلابی سنڈی) جیسے چیلنجز پر بھی سیر حاصل گفتگو کی گئی۔بعد ازاں وفد نے ادارے کی لیبارٹریز اور تجرباتی طور پر کاشتہ کپاس کی مختلف اقسام کے کھیتوں کا دورہ کیا اور جاری تحقیقی منصوبوں کا بغور جائزہ لیا گیا۔ ترجمان محکمہ زراعت پنجاب نے مزید بتایا کہ چائنا کے وفدنے ایک مشترکہ 3 تا 5 سالہ تحقیقی پروگرام پر اتفاق کیاجس کے تحت چینی اور پاکستانی ماہرین پر مشتمل ایک خصوصی گروپ قائم کیا جائے گا۔اس گروپ کا مقصد کپاس کی چینی اقسام کو پنجاب کے 10 مختلف مقامات پر آزمائشی بنیادوں پر کاشت کرنا ہوگا تاکہ ان اقسام کی موسمیاتی مطابقت، وائرس اور کیڑوں کے خلاف قوتِ مدافعت کا تجزیہ کیا جا سکے۔ اس کے علاوہ ماہرین نے مقامی اقسام کی تیاری،کپاس کے شعبے سے وابستہ افرادی قوت کی تربیت اور کاٹن بائیوٹیکنالوجی لیب کو مکمل فعال بنانے پر بھی ایک دوسرے کے ساتھ باہمی تعاون پر زور دیا۔یہ دورہ پاکستان اور چین کے درمیان زرعی تحقیق و ترقی میں باہمی تعاون کے ایک نئے باب کا آغاز ثابت ہوگاجس سے کپاس کی پیداوار میں خاطر خواہ بہتری کی توقع کی جا رہی ہے چائنا کے وفد کے دورہ کے موقع پر چیف سائنٹسٹ ایوب زرعی تحقیقاتی ادارہ فیصل آباد ڈاکٹر ساجدالرحمان،چیف ایگزیکٹو پارب ڈاکٹر عابد محمود،کاٹن کمشنر ڈاکٹر خادم حسین , ڈائریکٹر کاٹن ڈاکٹر غلام سرور جبکہ پرائیویٹ سیکٹر سے ڈاکٹر صغیراحمد ، ڈاکٹر اقبال بندیشہ کے علاوہ دیگر سٹیک ہولڈرز و زرعی سائنسدانوں نے شرکت کی اور کپاس کی کاشت و نگہداشت بارے مختلف پہلوؤں پر مفید تجاویز پیش کیں۔