لیہ جماعت پنجم اور ہشتم کے نتائج ،پنجاب میں ضلع نے بالترتیب دوسری اور تیسری پو زیشن حاصل کی ۔ڈسٹرکٹ ایجوکیشن آفیسر ذوالفقار علی

لیہ(صبح پا کستان )ضلع لیہ میں جماعت پنجم اور ہشتم کے امتحانات میں 98.48فی صد رزلٹ حاصل کرکے ضلع لیہ مجموعی طور پر دوسرے نمبر پر جبکہ پانچویں میں پنجاب بھر میں تیسری پوزیشن حاصل کی اور مجموعی طور پر 48789طلبہ اور طالبات پاس ہوئے ۔یہ بات ڈسٹرکٹ ایجوکیشن آفیسر ذوالفقار علی نے جماعت پنجم اور ہشتم کے پوزیشن ہولڈرز کے نتائج کا اعلانات کرنے کے موقع پرکہی۔ڈی ڈی تعلیم توکل حسین ،رجسٹرار عبدالرحیم ندیم اور پرنسپل شرافت علی بسراموجود تھے۔ذوالفقارعلی نے بتایا کہ ضلع لیہ میں جماعت پنجم میں مجموعی طور پر 32697طلبا اور طالبات امتحان میں شامل ہوئے جن میں سے 29826پاس ہوئے جو 98.08فی صد رہا۔اسی طرح جماعت ہشتم میں 20849طلبہ شامل ہوئے جن میں سے 18963نے کامیابی حاصل کی جبکہ نتیجہ 98.48فی صدرہا۔انہوں نے مزید بتایا کہ جماعت پنجم میں 169سنٹرز ،ہشتم میں 141سنٹرز پر امتحانات ہوئے اور منظم مانیٹرنگ پیف اور تھرڈ پارٹی چیکنگ جاری رہی اور شفاف انداز میں ضلع کو پنجاب بھر میں دوسرے نمبر کا اعزاز حاصل ہوا۔انہوں نے بتایا کہ کلاس پنجم میں ڈسٹرکٹ پبلک سکول لیہ کے طالب علم محمد حذیفہ اورملت پبلک سکول چوک اعظم کے شیراز علی نے پہلی اورگورنمنٹ مسلم ہائی سکول چوک اعظم کے طالب علم حسنین المصطفی نے دوسری پوزیشن حاصل کی ۔اسی طرح تھرڈ پوزیشن مہوش رباب الحمد پبلک سکول لیہ ،محمد بشیر آکسفورڈ پبلک سکول چوک اعظم ،امبر فاطمہ بیکن لائٹ گرلز پبلک سکول فتح پور اور معظم علی یوسف نیو سینچری پبلک سکول بھاگل نے حاصل کی۔کلاس پنجم میل میں محمد حذیفہ اور شیراز علی نے پہلی ،حسین المصطفی نے دوسری ،محمد بشیر اور معظم علی یوسف نے تیسری پوزیشن اسی طرح کلاس پنجم فیمیل میں مہوش رباب اور امبر فاطمہ نے پہلی ،عائشہ بتول گریژن پبلک سکول کوٹ سلطان نے دوسری جبکہ کائنات فاطمہ سٹی پبلک سکول فتح پور اور مناہل حبیب نیو سینچری پبلک سکول بھاگل نے تیسری پوزیشن حاصل کی۔ڈی او تعلیم نے بتایا کہ کلاس ہشتم میں مجموعی طور پر عائزہ مظفر ڈسٹرکٹ پبلک سکول گرلز ونگ نے پہلی ،ثمرہ بی بی مسلم سائنس پبلک ہائی سکول نے دوسری جبکہ ڈسٹرکٹ پبلک سکول کی مریم خضر نے تیسری پوزیشن حاصل کی۔انفرادی طور پر میل میں محمد یوسف گریژن پبلک سکول کوٹ سلطان اور احمد البشرنے پہلی ،حاد علی گورنمنٹ مسلم ہائی سکول چوک اعظم نے دوسری اور صارم حسین شہاب گورنمنٹ ہائی سکول ریلوئے روڈ کروڑ نے تیسری پوزیشن حاصل کی۔فیمیل میں عائزہ مظفر ڈسٹرکٹ پبلک سکول گرلز ونگ نے پہلی ،ثمرہ بی بی مسلم سائنس پبلک ہائی سکو ل نے دوسری اور مریم خصر ڈسٹرکٹ پبلک سکول گرلز ونگ نے تیسری پوزیشن حاصل کی۔ڈی او تعلیم نے بتایا کہ امتحانا ت کے ٹاسک کے لیے بروقت مارکنگ کے لیے پرچے بروقت سنٹرز پر پہنچانے ،رزلٹ کی فیڈنگ کی نگرانی کو یقینی بنانے کے لیے ضلعی،تحصیل اور مرکز کی سطح پر افسران تعلیم ،سکولوں کے سربراہان اور اساتذہ کرام نے اپنی ذمہ داریاں ،محنت اور جاں فشانی سے سرانجام دے کر تمام مراحل کو اپنی بھر پور صلاحتیں لاتے ہوئے پایہ تکمیل تک پہنچایا۔