لیہ(صبح پا کستان)تین روزہ لیہ تھل میلہ کی رنگارنگ تقریبات اختتام پذیر ہو گئیں۔تحصیل چوبارہ میں سکینڈ تھل جیپ ریلی کے مڈ پوائنٹ پر منعقدہ اس میلہ کے آخری روز ہزاروں کی تعداد میں شائقین موجو د تھے۔لیہ تھل میلہ میں حصہ لینے والے کھلاڑیوں اور سٹال منتظمین میں انعامات تقسیم کرنے کے لیے پروقار تقریب کا اہتمام کیا گیا۔تقریب کے مہمان خصوصی ڈپٹی کمشنر واجد علی شاہ تھے۔اس مو قع پرصوبا ئی وزیراقدامات برائے قدرتی آفات مہر اعجاز احمد اچلا نہ، ایم این اے سید ثقلین بخاری ، ایم این اے صاحبزادہ فیض الحسن سواگ ، سابق صوبا ئی وزیر ملک احمد علی اولکھ ، ایم پی اے چوہدری اشفاق احمد ،ایم پی اے قیصر عباس مگسی ، چیئر مین ضلع کو نسل ملک عمر علی اولکھ ،سابق ایم پی اے ملک عبد الشکور سواگ ، چیئر مین میو نسپل کمیٹیز حافظ جمیل احمد ، مظہر عباس مگسی ، اظہار کا لو ، ملک ریاض گرواں ، ممبران ضلع کو نسل و کو نسلرز ،رانا اعجاز سہیل ، قیصر عباس بھٹی انتظا می افسران و شہریو ں کی کثیر تعداد مو جو د تھی۔تقریب تقسیم انعامات سے خطاب کرتے ہوئے مہمان خصوصی ڈپٹی کمشنر واجد علی شاہ نے کہا کہ زندہ قومیں اپنی ثقافت کو ختم نہیں ہونے دیتیں لیہ تھل میلہ علاقہ کی شناخت اور ثقافت کو زندہ رکھنے کی بہترین کوشش ہے۔انہوں نے کہا کہ حکومت پنجاب پسماندہ علاقوں کی فلاح و بہبود کے لیے دور رس نتائج کے لیے عملی اقدامات اْٹھارہی ہے لیہ تھل میلہ اور تھل ڈیزرٹ ریلی اس وژن کی عملی تعبیر ہے جس سے تعمیر وترقی اور روز گار کے نئے راستے کھلیں گے۔تقریب سے ایم این اے سید ثقلین شاہ بخاری نے خطاب کرتے ہوئے کہا کہ ضلع میں ایک مثبت تفریحی سرگرمی کی کامیاب بنیاد رکھ دی گئی ہے جس سے نہ صرف علاقہ کو شناخت ملے گی بلکہ موثر سپورٹس اور سیاحت کو بھی فروغ ملے گا۔انہوں نے کہا کہ اب مقامی دستکاریوں کو منڈیوں تک اپنی اشیاء لے جانے کی ضرورت نہیں بلکہ مارکیٹ خود چل کر ان کی دہلیز پرآئی ہے جہاں وہ اپنی محنت اور ہنر کا مناسب صلہ پاسکیں گے۔ ایم پی اے قیصر عباس مگسی نے تقریب سے خطاب کرتے ہوئے کہاکہ تحصیل چوبارہ کی عوام انتہائی خوش نصیب ہے کہ یہاں ایک بین الاقوامی سطح کا ایونٹ منعقدہوا ہے۔ انہوں نے کہا کہ علاقہ اور مکینوں کی فلاح و بہبود میں اس قسم کے ایونٹ کلیدی کردار ادا کرتے ہیں۔تقریب سے ایم پی اے چوہدری اشفاق احمد،سابق صوبائی وزیر احمد علی اولکھ نے و دیگر نے بھی اظہار خیال کرتے ہوئے لیہ تھل میلہ کے انعقاد کوخوش آئند قرار دیتے ہوئے منتظمین خصوصاًڈپٹی کمشنر واجد علی شاہ کو خراج تحسین پیش کیا۔ لیہ تھل میلہ و کے اختتامی روزمیونسپل کمیٹی چوبارہ کے زیر اہتمام کبڈی میچ منعقد ہوا۔ کبڈی میچ آرمی نے واپڈا کے خلاف 28کے مقابلے میں 30پوائنٹ سے جیت لیا۔اسی طرح شوٹنگ والی کے میچ میں پنجاب پولیس ڈی جی خان فاتح رہی۔ڈپٹی کمشنر واجد علی شاہ اور ایم پی اے قیصر عباس مگسی نے فاتح ٹیموں کے کپتانوں ودیگر کھیلاڑیوں میں ٹرافیاں و انعامات تقسیم کیں۔بعدازاں نیزہ بازی ،والی بال ،کبڈی ،اسٹال ،منتظمین و دیگر نمایاں کارکردگی کے حامل افراد میں ٹرافیاں ،شیلڈز اور تعریفی اسناد تقسیم کی گئیں۔
