ڈیرہ غازیخان(صبح پا کستان)ضلع ڈیرہ غازیخان میں وال چاکنگ اور پوسٹر ہٹاؤ مہم کا تنبیہی دورانیہ ختم . آئندہ وال چاکنگ کرنے اور کرانے والوں کی گرفتاریاں اور بھاری جرمانے عائد کیے جائیں گے. پرنٹنگ پریس اور وال چاکنگ کے کاروباری افراد کو وارننگ جاری کر دی گئی . متعلقہ میونسپل کمیٹی سے تحریری اجازت حاصل کرنے والوں کا مواد اشاعت و نشر ہو سکے گا. پنجا ب اور پٹرولنگ پولیس سمیت منتخب نمائندوں اور محکموں کو خصوصی ٹاسک دے دیاگیاہے. اس بات کا فیصلہ کمشنر اللہ رکھا انجم کی زیر صدارت اجلاس میں کیاگیا. اجلاس میں اراکین صوبائی اسمبلی سردار جاوید اختر لنڈ ، خواجہ نظام المحمود ، بیگم نجمہ ارشد ، ایڈیشنل ڈپٹی کمشنر جنرل میاں محمد اقبال مظہر ، اسسٹنٹ کمشنرز خالد محمود گوپانگ ، عبدالجبار سمیت نو منتخب نمائندے تاجر تنظیم ، این جی اوز کے عہدیدار اور سرکاری افسران موجود تھے . اجلاس میں بتایاگیاکہ وال چاکنگ ایکٹ کے تحت چھ ماہ قید ، دو ہزارروپے سے 25ہزار روپے تک جرمانہ عائد کیاجاسکتاہے . بل بورڈ پر تشہیری مواد نشر کرنے کیلئے متعلقہ اتھارٹی سے پیشگی اجازت لینا ہو گی اور باقاعدہ دورانیہ مقرر کر کے فیس وصول کی جائے گی. کمشنر اللہ رکھا انجم نے کہاکہ مہم کی آڑ میں کسی کو ناجائز تنگ کرنے کی اجازت نہیں دی جائے گی. بلاامتیاز کارروائی جاری رکھی جائے. کارروائی سے پہلے اور بعد کا منظر تصویری اور ویڈیو ریکارڈ میں پیش کیا جائے. انہوں نے کہا کہ حکومت پنجاب کی ہدایت پر ہر قسم کی وال چاکنگ پر پابندی عائد ہے جس پر سو فیصد عملدرآمد کرایا جائے گا اور وہ خود بھی فیلڈ میں نکلیں گے اور میڈیا کے ساتھ مل کر مہم کا حصہ بنیں گے .کمشنر نے کہاکہ مہم کیلئے میونسپل کمیٹیوں کے چیف آفیسرز کی سربراہی میں ٹیمیں تشکیل دی جائیں گی اسسٹنٹ کمشنر اپنی تحصیل کے ذمہ دار ہوں گے . اجلاس میں اراکین اسمبلی نے شہر کے ساتھ قصبات میں بھی مہم کو موثر بنانے کیلئے تجاویز پیش کیں.