معلمات کو ہراساں کرنے پر ہیڈ ماسٹر کو دو سال کی سالانہ ترقی روکنے کی سزا.خاتون محتسب پنجاب کا فیصلہ

لاہور(مانیٹرننگ ڈیسک )خاتون محتسب پنجاب فرخندہ وسیم افضل نے لاہو رکے ایک گورنمنٹ سکول کے ہیڈ ماسٹر کو تین خواتین اساتذہ کو ہراساں کرنے پر سزا سنائی ۔ شکایت کنندگان نے خاتون محتسب پنجاب کو درج کردہ شکایات میں ہیڈ ماسٹر پر غیر اخلاقی باتیں کر کے کام کے ماحول میں خوف و ہراس پیدا کرنے کے الزامات لگائے ۔
خاتون محتسب پنجاب نے شکایات پر تفصیلی سماعت کی اور فریقین اور ان کے گواہوں کا موقف سنا اور ہیڈ ماسٹر پر الزامات ثابت ہونے پر دو سال کی سالانہ ترقی روکنے کی سزا سنائی ۔ مزید متعلقہ محکمہ کو ہیڈ ماسٹر کو خواتین کے اداروں میں تعینات نہ کرنے کی ہدایت دی ۔ خاتون محتسب پنجاب نے کہا کہ زیادہ تر خواتین نوکری ختم ہو جانے کے ڈر سے اور خاندانی دباؤ کی وجہ سے شکایت درج کروانے سے گریز کرتی ہیں تاہم ایسی شکایات کے رد عمل میں خاموشی اختیار کرنے سے اس قسم کے غلط رویے کو مزید فروغ ملتا ہے اس لئے خواتین کو چاہیے کہ خاموشی اختیار کرنے کی بجائے انکوائری کمیٹی میں شکایت درج کروائیں۔
source ..
http://dailypakistan.com.pk