محرم الحرام کے دوران فول پروف سیکورٹی اور بہتر میونسپل سروسز کی فراہمی میں غفلت برداشت نہیں کی جائے گی ۔ مہراعجاز احمد اچلانہ
لیہ (صبح پا کستان )ضلع لیہ میں محرم الحرام کے دوران فول پروف سیکورٹی اور بہتر میونسپل سروسز کی فراہمی کے لیے تمام انتظامات مکمل کر کے ڈیوٹی روسٹر کے مطابق خدمات سرانجام دی جارہی ہیں اس سلسلہ میں کسی قسم کی غفلت و لاپرواہی برداشت نہ کی جائے گی۔یہ بات صوبائی پارلیمانی سیکرٹری برائے داخلہ مہراعجاز احمد اچلانہ نے محرم الحرام انتظامات کے جائزہ اجلاس کی صدارت کرتے ہوئے کہی ۔ڈی سی او سید واجدعلی شاہ موجود تھے۔اجلاس میں ڈی او سی محبوب احمد نے ملٹی میڈیا کے ذریعے ضلع بھر کی 1778مجالس عزاء و عزاداری کے 133جلوسوں کو فول پروف سیکورٹی کور دینے و معیاری میونسپل سروسز کی فراہمی کے لیے اٹھائے گئے اقدامات جن میں ضابطہ اخلاق کی پابندی ،تجاوزات کے خاتمے ،روٹس پر روشنی ،چھٹرکاؤ ،صحت وصفائی ،122سی سی ٹی وی کیمروں کی تنصیب ،18واک تھرو گیٹس،ایمرجنسی لائٹس،جنریٹرز کی فراہمی،محکمہ صحت ،1122،سول ڈیفینس،سپیشل برانچ،ٹیلی فون،سوئی گیس ،واپڈا،کے اہلکاروں کی خدمات کا حصول و یگر ضروری امور شامل ہیں کے بارے میں بریفنگ دی۔مہراعجاز احمد اچلانہ نے ہدایت کی کہ ڈیوٹی روسٹر کے مطابق خدمات کویقینی بنانے کے لیے ضروری اقدامات عمل میں لائے جائیں اور مرکزی کنٹرول روم سے موثر رابطے کے لیے موبائل سروسز بندہونے کی صورت میں وائرلیس سسٹم و لینڈلائن ٹیلی فون کو چالو رکھنے اور ڈیوٹی پر مامور عملے کو سختی سے پابند رکھنے کی ہدایت کی۔اسی طرح اجلاس میں فیصلہ کیاگیاکہ 9اور 10محرم کو ڈبل سواری پر پابندی کے علاوہ ضلع بھر کے تما م پتن بھی آمدورفت کے لیے بندرہیں گے۔اجلاس میں مہر اعجاز احمد اچلانہ نے ڈی ایچ کیوہسپتال میں تمام ضروری ایمرجنسی طبی سہولیات کی فراہمی اور ایمبولینسزکوالرٹ رکھنے کی ہدایت کی۔ اجلاس میں اے ڈی سی نعیم اللہ بھٹی نے میونسپل سروسز ،ای ڈی او صحت ڈاکٹر ضیاء الحسن نے طبی سہولیات بلڈبنک میں خون کے87 بیگز کی موجودگی،اسی طرح سول ڈیفینس آفیسر محمد حنیف قادری نے 77رضا کاروں ،بم ڈسپوزل سکواڈ کی ڈیوٹی کے بارئے میں آگاہی دی اور واپڈا،ٹیلی فون،سوئی گیس کے حکام نے عزاء داری کے جلوسوں کے روٹس پر فراہم کردہ سہولیات ،ڈسٹرکٹ ایمرجنسی آفیسر 1122ڈاکٹر محمد تسلیم نے ایمرجنسی صورت حال سے نمٹنے کے لیے مکمل تیاری کے بارئے میں بریفنگ دی۔اجلاس میں مہرا عجاز احمد اچلانہ نے ہدایت کی کہ یوم عاشور تک سیکورٹی و دیگر تمام سہولیات کے لیے مامور عملے کو اپنی خدمات مکمل ذمہ داری ،تندہی و لگن سے سرانجام دینے کی ضرورت پرزور دیا۔اجلاس میں مرکزی کنٹرول روم جس کافون نمبر 0606-920014ہے فعال رکھنے اورڈی اوسی محبوب احمد کو فوکل پرسن مقررکرنے کافیصلہ کیاگیا۔
