مزدوروں کے عالمی دن کے موقع پرتین تھریشر مزدور ٹریفک حادثہ میں ہلاک
چوک اعظم (صبح پا کستان )مزدوروں کے عالمی دن کے موقع پر تھریشر پر کام کرنے والے ایک ہی خاندان کے تین مزدور موٹر ساےئکل کار تصادم میں جاں بحق ،ایک شدید زخمی ۔حادثہ ٹرکو اڈہ اور چوبارہ کے درمیان اڈہ بشیرآباد کے قریب پیش آیا ۔متوفین نواں کوٹ سے موٹرسائیکل پر ٹرکو اڈہ مزدوری کے لیے آرہے تھے ۔تفصیل کے مطابق یکم مئی کے دن شام ساڑھے 6بجے ٹرکو اڈہ سے دو کلو میٹر چوبارہ کی طرف کار اور موٹر سائیکل میں تصادم ہوا جس کے نتیجہ میں موٹر سائیکل پر سوارمظہر ،سلیم موقع پر جاں بحق ہو گئے جبکہ بشیر احمد نے چوک اعظم ہسپتال میں دم توڑ دیا ۔ان کے چوتھے ساتھی اکرم کی حالت تشویشناک بتائی گئی ہے جسے لیہ ڈی ایچ کیو ریفر کر دیا گیا ۔ان سب کا تعلق ایک ہی خاندان سے ہے اور یہ نواں کوٹ کی نواحی بستی شیمار کے مقیم تھے ۔کار نمبر339اسلام آباد کا ڈرائیور گاڑی کھڑی کر کے موقع سے فرار ہو گیا ۔حادثہ کی اطلاع ملتے ہی ریسکیو 1122اور پٹرولنگ پولیس رفیق آباد موقع پر پہنچ گئی جنہوں نے زخمیوں کو ہسپتال پہنچایا ۔
رپورٹ ۔ محمد عمر شاکر پریس رپورٹر چوک اعظم
