لیہ(صبح پا کستان)وزیراعظم کی معاون خصوصی برائے سماجی تحفظ و تخفیف غربت ڈاکٹر ثانیہ نشتر نے کہا ہے کہ کل جمعہ کووزیراعظم عمران خان لیہ میں احساس آمدن پروگرام کا اجراء کریں گے، احساس آمدن پروگرام احساس فریم ورک کے تحت جاری کئے جانے والے پروگراموں میں سے ایک ہے جس کا بنیادی مقصد پسماندہ طبقات کیلئے ذریعہ معاش کے مواقع پیدا کرنا ہے
احساس اثاثہ جات سکیم سے مستحق افراد اپنی آمدن کما کر اپنے روٹی،کپڑے اور مکان کا خود انتخاب کریں گے۔اس پروگرام کے تحت انتہائی مستحق افراد کو مفت اثاثے دے کر باعزت روزگار کے قابل بنایا جارہا ہے۔روزگارکی فراہمی سے ہی مستحق افراد غربت کی لکیر پار کرسکتے ہیں۔یہ بات معاون خصوصی وزیر اعظم پاکستان براے بے نظیر انکم سپورٹ پروگرام ثانیہ نشتر نے ڈی سی آفس کمیٹی روم میں پریس کانفرنس کرتے ہوئے کہی۔اس موقع پر کوارڈی نیٹر ڈاکٹر شہباز گِل،ضلعی صدر پی ٹی آئی افتخارعلی بابر کھتران،بشارت رندھاوا،مینجراحساس پروگرام محمدفاضل اور ذرائع ابلاغ کے نمائندوں کی کثیرتعداد موجود تھی۔انہوں نے کہا کہ وزیر اعظم پاکستان عمران خان احساس پروگرام کا21فروری کو سپورٹس کمپلیکس میں منعقدہ تقریب میں مستحق افراد کو اثاثہ جات دے کر افتتاح کریں گے۔ثانیہ نشتر نے بتایا کہ شفاف سروے کے بعد میرٹ پر آنے والے انتہائی مستحق افراد میں 60ہزار مالیت کے اثاثے مفت تقسیم کیے جائیں گے۔انہوں نے مختلف سوالات کے جوابات میں بتایا کہ60فی صد خواتین،40فیصد مرد و دیگر کیمونٹی سے انتخاب کیاگیا ہے احساس اثاثہ جات پروگرام کے تحت منتخب افراد میں 60ہزار مالیت کی گائے بکریاں،رکشے،ٹھیلے اور دوکانوں کے لیے سامان مہیاکیاجائے گاتاکہ وہ باعزت روزگار کماکر اپنے کنبے کی کفالت کرسکیں۔
اس پروگرام کے تحت مستحقین کی رجسٹریشن غربت سروے کے تحت جاری ہے۔جس کا دائرہ ملک بھر کی 375پسماندہ یونین کونسل کے 1لاکھ 76ہزار خاندانوں کو مستفید کرنے کے لئے جاری ہے اورضلع لیہ کی 20یونین کونسلوں کے 10ہزار خاندانوں کو پہلے مرحلے میں احساس پروگرام کے تحت اثاثے دیے جارہے ہیں تاکہ یہ افراد غربت کی لکیر سے باہر نکل کر ملکی معیشت میں بہتر روزگار کے ذریعے اپنا حصہ ڈال سکیں۔ ایک سوال کے جواب میں ثانیہ نشتر نے کہا کہ حکومت پر بھروسہ رکھا جائے وزیر اعظم عمران خان انتہائی دیانت داری سے غریب طبقہ کو قومی ترقی کے دھارے میں لانے کے لئے ہرممکن اقدامات اُٹھارہے ہیں۔انہوں نے کہا کہ اس پروگرام کی انتہائی سخت مانیٹرنگ کی جارہی ہے جس میں کرپشن،بدعنوانی اور صوابدیدی اختیارات کی ہرگز گنجائش نہیں ہوگی اور خالصتاً ویلج کمیٹیوں کے تحت سروے اور سیکروٹنی کاعمل مکمل کیا جارہا ہے۔
کوارڈی نیٹر ڈاکٹر شہباز گل نے ایک سوال کے جواب میں کہا کہ وزیر اعظم عمران خان 66کروڑ روپے کے اخراجات سے چلنے والے وزیر اعظم ہاؤس کو اب صرف 2لاکھ روپے ماہانہ میں چلارہے ہیں اور ملکی تاریخ میں پہلی بار وزیر اعظم خود اپنے تمام بلوں کی ادائیگی کررہے ہیں۔
