لیہ(صبح پاکستان)ضلع لیہ کے 1ہزار سے زائد ایس ایس ای،اے ای اوز،کمپوٹر اساتذہ کا مستقل نہ کرنے پر ڈسٹرکٹ پریس کلب کے باہر احتجاجی مظاہرہ،21جنوری کو سول سیکرٹریٹ کے باہر پنجاب بھر کے اساتذہ مطالبات کی منظوری تک احتجاجی دھرنا کا اعلان کردیا،
تفصیلات کے مطابق ایس ایس ای،اے ای اوزریگولرئزیشن موومنٹ پنجاب کے زیر اہتمام ایس ایس ای ایسوسی ایشن ضلع لیہ،اے ای اوز ایسو سی ایشن ضلع لیہ،کمپوٹر ٹیچر ایسو سی ایشن ضلع لیہ،متحدہ محاذ اساتذہ کے عہدیدران نے مشترکہ احتجاج کرتے ہوئے کہا کہ 2014ء سے محکمہ تعلیم میں اپنی خدمات سرانجام دے رہے ہیں لیکن حکومت پنجاب محکمہ تعلیم ہمیں مستقل نہیں کررہی جس کی وجہ سے تمام نوجوان اساتذہ،اے ای اوز و دیگر اپنی تعلیمی سرگرمیوں کو بہتر انداز میں پر فارم نہیں کررہے انہوں نے کہا کہ جب ہمیں بھرتی کیا گیا تو این ٹی ایس کے امتحان پاس کرنے کے بعد ہمیں نوکری کے آرڈرز دے دیئے گئے موجودہ حکومت نے اپنی نئی پالیسی مرتب کرتے ہوئے ہمیں پنجاب پبلک سروس کمشن کے تحت امتحان دینے کی تلوار لٹکا دی جس کی وجہ سے 6سال سے محکمہ تعلیم میں اپنی خدمات سرانجام دینے والے ضلع لیہ کے 1ہزار سے زائد نوجوان اساتذہ،اے ای اوز،کمپوٹر ٹیچر و دیگر کو بے روز گار کرنے کی تلوار لٹکا دی گئی ہے،انہوں نے کہا کہ ہمارے ابتدائی کئے جانے والے آرڈرز میں ایسی کسی قسم کی کوئی شق شامل نہ کی گئی تھی جس کی بنیاد پر ہمیں ایک مرتبہ پھر پنجاب سروس کمیشن کا امتحان دینے کا حکم دیا جارہا ہے،انہوں نے وزیر اعظم پاکستان عمران خان،وزیر اعلیٰ پنجاب سردار عثمان بزدار سے مطالبہ کرتے ہیں کہ انہوں نے اپنی ابتدائی پالیسی میں اعلان کیا تھا کہ تحریک انصاف کی حکومت نے 1کروڑ نوکریاں دینے کا کہا تھا جبکہ پالیسی کو تبدیل کرتے ہوئے اب ہم نوجوانوں سے روز گار چھینے کا بندوبست کیا جارہا ہے ہمارا مطالبہ ہے کہ پی پی ایس سی کے امتحان کی تلوار کو فوری طور پر ختم کرکے ہمارے مستقل بنیادوں پر آرڈرز نکالے جائیں،اگر ایسا نہ کیا گیا تو ابتدائی طور پر ہم 21جنوری کو سول سیکرٹریٹ کے باہر پنجاب بھر کے اساتذہ اپنے مطالبات کی منظوری کیلئے احتجاجی مظاہرہ کریں گے اگر پھر بھی ہمیں مستقل کرنے کے احکامات جاری نہ کئے گئے تو اپنے احتجاج کا دائرہ کار وسیع کرکے مستقل بنیاد پر قائدین کی مشاورت سے احتجاجی پلان ترتیب دیا جائے گا،احتجاجی دھرنا سے ضلعی صدر ایس ایس ای محمد سہیل جوتہ،لیاقت علی،مدثر خان،محمد تنویر،ضلع صدر اے ای اوز ایسوسی ایشن موسیٰ خان،منیبہ قیوم،کمپوٹر ٹیچر ایسوسی ایشن ڈویژنل صدر چوہدری عتیق الرحمن،ملک عامر شبیر بودلہ ضلعی صدر و دیگر نے خطاب کیا،احتجاج میں ضلع بھر کے سینکڑوں مرد و خواتین اساتذہ نے شرکت کی۔
