کمشنر ڈیرہ غازیخان نسیم صادق، عوامی مسائل کے حل کے لئے ا ن ایکشن

ڈیرہ غازیخان ( صبح پا کستان)کمشنر ڈیرہ غازیخان ڈویژن نسیم صادق نے ڈپٹی کمشنر طاہر فاروق کے ہمراہ زیر تعمیر ڈیرہ مظفر گڑھ دورویہ سڑک کا دورہ کیا۔کمشنر نے روڈ کے دونوں اطراف رائٹ آف وے کو ہر قسم کے تجاوزات سے پاک کرنے اور زمین کو ہموار کرکے شجرکاری کی ہدایات جاری کیں۔کمشنر نے کہا کہ روڈ پر 24 گھنٹے کام ہوتا نظرآنا چاہیے۔سڑک کے دونوں کناروں پر گرین بیلٹس بنائی جائیں گی۔کمشنر نے کہا کہ تجاوزات مافیا کو وارننگ جاری کرنے کے بعد بلا امتیاز آپریشن کیا جائے۔کمشنر نے روڈ کی تعمیراتی کمپنی کو خامیاں فوری دور کرنے کی ہدایات جاری کیں.
علاوہ ازیں کمشنرنسیم صادق نے مانکا کینال کا بھی جائزہ لیا انہوں نے مانکا کینال کے دونوں کناروں سے ہر قسم کی تجاوزات ختم کرنے،عمارتی مٹیریل اور دیگر ملبہ صاف کرنے کے احکامات جاری کیے۔کمشنر نے مانکا کینال کے اندر کوڑا کرکٹ ڈالنے والوں کے خلاف کارروائی کے بھی احکامات جاری کیے۔کوڑا کرکٹ ڈالنے والوں کی نشاندہی کیلئے نقد انعام دینے کا بھی اعلان کیا جس کیلئے رابطہ نمبرز کی جلد تشہیر کی جائے گی۔
دریں اثناء کمشنرنسیم صادق نے جنرل بس سٹینڈ کا بھی دورہ کیا۔کوڑا کرکٹ کے ڈمپنگ پوائنٹ کا جائزہ لیا۔انہوں نے واٹر فلٹریشن پلانٹ کا بھی معائنہ کیا۔پلانٹ کی صفائی اور دیگر معلومات حاصل کیں۔
مزیدڈپٹی کمشنر ڈیرہ غازیخان طاہر فاروق نے کہا کہ ڈیرہ غازی خان شہر کی صفائی کیلئے تین ٹیمیں تشکیل دی جائیں گی۔شہر کی دس اہم روڈز کی صفائی اور چھڑکاؤ کیلئے متعین ٹیم روزانہ رات چار بجے نکلے گی، شہر کے بلاکس میں صفائی سات بجے صبح باقاعدگی سے کی جائے گی۔ڈپٹی کمشنر نے کہا کہ شہر کیلئے عملہ صفائی کا موبائل سکواڈ بھی بنایا جائے جو گاڑیوں پر شہر کا دورہ کرتا رہے اور جہاں کوڑا نظر آئے تو اسے اٹھالیا جائے۔انہوں نے چیف آفیسر میونسپل کارپوریشن کو ہدایات جاری کیں کہ ٹیمیں تشکیل دے کر رپورٹ پیش کی جائے۔انہوں نے کہا کہ ٹیموں کی فیلڈ میں حاضری چیک کی جائیگی۔غیر حاضر اور کاہل عملہ کو برطرف کردیا جائیگا۔