لاہور ۔ سیشن عدالت کی جانب سے اشتعال انگیز تقاریر کیس میں کیپٹن ریٹائرڈ صفدر کی درخواست ضمانت منظوری کے بعد انھیں جیل سے رہا کر دیا گیا ہے۔
روبکار جاری ہونے پر کیپٹن (ر) محمد صفدر کی رہائی عمل میں لائی گئی۔ اس سے قبل ایڈیشنل سیشن جج تجمل شہزاد نے درخواست ضمانت پر محفوظ فیصلہ سناتے ہوئے انھیں رہا کرنے کا حکم دیا تھا۔
سابق وزیراعظم نواز شریف کے داماد کیپٹن ریٹائرڈ صفدر نے درخواست ضمانت کے لیے عدالت سے رجوع کیا تھا اور فرہاد علی شاہ ایڈووکیٹ کے توسط سے ضمانت دائر کی تھی۔
درخواست میں موقف اپنایا گیا تھا کہ کیپٹن (ر) صفدر کو سیاسی انتقام کا نشانہ بنایا گیا، وہ ایک سیاسی شخص ہیں، حکومت کے خلاف تحریک چلانے کی بات کرنا جمہوری حق ہے، اگر اس بیان پر مقدمے درج ہو گئے تو پھر موجودہ حکمرانوں پر بھی مقدمے درج کیے جائیں، کیپٹن (ر) صفدر کو نواز شریف کا داماد ہونے کی سزا دی جارہی ہے، عدالت کیپٹن ر صفدر کو ضمانت پر رہا کرنے کا حکم دے۔
