لیہ ۔ ٹریفک پولیس اہلکارپر تشدد کرنے والوں کے خلاف مقد مہ درج ،ملزمان گرفتار

لیہ( صبح پا کستان )ٹریفک پولیس اہلکارپر تشدد کرنے والوں کے خلاف تھانہ سٹی کی بر وقت کاروائی ،ملزمان گرفتار ،مقدمہ درج ،تفصیلا ت کے مطابق ٹریفک پولیس اہلکارپر مسلح حملہ آور اور تشدد کے ملزمان تھانہ سٹی پولیس نے بر وقت کاروائی کرکے گرفتار کر لیے ،ٹریفک پولیس اہلکار محمد فیاض صدر بازار چوک پر ٹریفک کے بہاءو کےلئے مامور تھاکہ اسی دوران ایک شخص موٹر سائیکل روک کر بازار کے چوک میں کھڑا ہو گیا،جس سے مرد و خواتین کے آنے جانے میں خلل پڑنے لگا ،محمد فیاض نے موٹر سائیکل سوار کو جانے کا کہا تو ملزم مشتعل ہو گیا اور اپنے ساتھی علی رضا شیخ ، ندیم انصاری مسلح پسٹل 30بوراور عمیر شہزاد مسلح خنجر کے ہمراہ محمد فیاض پر حملہ آور ہو گیا ،ٹریفک اہلکار کو زدو کوب کیا ،تشدد کا نشانہ بنایا ، گالیاں دیں اوروردی بھی پھاڑ دی ،ایس ایچ او تھانہ سٹی عرفان افتخار نے کاروائی کرتے ہوئے ملزمان کو گرفتار کر لیا اور ملزما ن کے خلا ف تعزیرات پاکستان کی مختلف دفعات کے تحت مقدمہ کا اندراج کر لیا ،اس موقع پر ڈسٹرکٹ پولیس آفیسر لیہ رانا طاہر رحمن خان نے گفتگو کرتے ہوئے کہا کہ کار سرکار کی انجام دہی میں مزاحمت کرنے اور قانون کے محافظ پر مسلح حملہ کرنے والوں کے خلاف سخت قانونی کاروائی عمل میں لائی جائے گی ،چاہے ملزمان کتنے ہی با اثر کیوں نہ ہوں ،قانون سے بالاتر کوئی بھی نہیں ہے ،حقائق کی بنیاد پر صاف و شفاف تفتیش عمل میں لائی جائے گی ۔