شہباز شریف کو حقوق سے بڑھ کر سہولیات دیں، پی ٹی آئی کا رویہ بہتر رہے گا: عثمان بزدار

اسلام آباد . وزیر اعلیٰ پنجاب عثمان بزدار کا کہنا ہے کہ ماضی کی حکومتوں میں قیدیوں کے ساتھ غیر انسانی سلوک رکھا جاتا تھا لیکن تحریک انصاف کی حکومت کا رویہ بہتر رہے گا۔ وزیر اعلیٰ پنجاب سردار عثمان بزدار نے ایک بیان میں کہا کہ شہباز شریف صاحب کو لگتا ہے کہ آج بھی تمام حکومتیں ان کی اپنی ماضی کی حکومت کی طرح قانون کے برخلاف کام کرتی ہیں ۔ ماضی میں مخالف پارٹیوں کے قیدیوں کو ہر طرح کی اذیتیں دی جاتی تھیں، طبی سہولیات تو ک±جا، ان کے ساتھ غیر انسانی سلوک روا رکھا جاتا تھا۔اس کے برعکس تحریک انصاف کی حکومت نے بطور قیدی آپ کے حقوق سے بڑھ کر سہولیات فراہم کیں۔ وزیر اعلیٰ پنجاب نے واضح کیا کہ جیل مینوئل کے مطابق ہفتے میں ایک ملاقات کی اجازت ہے جو ضرور کروائی جائے گی، حکومت پنجاب جیل مینوئل کے مطابق دیگر تمام سہولیات بھی فراہم کرتی رہے گی۔ انہوں نے سابق وزیر اعلیٰ کو مخاطب کرکے کہا یقین رکھیے ہمارا رویہ آپ کے رویے سے بہتر رہے گا۔