لیہ ۔عاشورہ کے موقع پر سیکورٹی کے فول پروف انتظامات کو یقینی بنایا جائے ۔صوبائی وزیر کوآپریٹو مہر محمد اسلم

لیہ (صبح پا کستان )صوبائی وزیر کوآپریٹو مہر محمد اسلم نے کہا ہے کہ مذہبی ہم آہنگی پرامن پاکستان کے لیے لازمی جزو ہے ۔عاشورہ محرم الحرام کے دوران اتحاد و یکجہتی اور بھائی چارے کی فضاء کو پروان چڑھا کر شہدائے کربلا کو خراج عقیدت پیش کیاجائے۔انہوں نے یہ بات ڈی سی آفس کے کمیٹی روم میں عاشورہ محرم الحرام کے سیکورٹی انتظامات کے جائزہ اجلاس سے خطاب کرتے ہوئے کہی۔اس موقع پر ممبر صوبائی اسمبلی سردار شہاب الدین سیہڑ،ڈپٹی کمشنر رفاقت علی نسوانہ ،اے ڈی سی آرفخرالاسلام ڈوگر،اے سی لیہ شاہدعباس کاٹھیا ،کروڑلیاقت علی گیلانی ،چوبارہ عبدالرزاق ڈوگر ،سی ای او صحت ڈاکٹر آغا توحید احمد خان ،ایس پی انوسٹی گیشن محمد باقراور متعلقہ افسران موجودتھے۔صوبائی وزیر نے کہا کہ عوام کی جان و مال کا تحفظ اور امن و امان کو برقرار رکھنا حکومت کی اولین ترجیح ہے اور اس سلسلے میں حکومت پنجاب وزیر اعلی کی ہدایات کے مطابق تمام ضروری اقدامات اُٹھارہی ہے ۔انہوں نے افسران کو ہدایت کی کہ وہ عاشورہ کے موقع پر سیکورٹی کے فول پروف انتظامات کو یقینی بنائیں حکومت انہیں ہرممکن سپورٹ فراہم کرے گی۔ڈپٹی کمشنر رفاقت علی نسوانہ نے بریفنگ دیتے ہوئے بتایا کہ ضلع میں 1778مجالس عزاء منعقدہوں گی جن میں سے 160اے کیٹگری کی ہیں ۔ڈی سی نے بتایا کہ مرکزی جلوس سمیت دیگر مجالس اور مذہبی مقامات کو بھرپور سیکورٹی فراہم کی جائے گی اور ایمرجینسی ڈاکٹرز و ریسکیو 1122 سٹاف کی چھٹیاں منسوخ کرکے ڈیوٹیاں تفویض کردی گئی ہیں۔انہوں نے بتایا کہ آرمی کی دو جبکہ رینجرز کی ایک کمپنی ضلع میں تعینات کی گئی ہے ۔انہوں نے بتایا کہ سیکورٹی نقطہ نظر سے دریائی پتن 9اور 10محرم الحرام تک سیل کیے گئے ہیں۔انہوں نے مزیدبتایا کہ ضلع میں 28مقررین کی زبان بندی کی گئی ہے جبکہ 50مقررین کا ضلع میں داخلہ منع کیا گیا ہے ۔بعدازاں صوبائی وزیر نے امام بارگاہ حسینیہ کا دورہ کیا اور سیکورٹی انتظامات کا جائزہ لیا ۔