لیہ(صبح پا کستان)متحدہ مجلس عمل کے پلیٹ فارم سے الیکشن میں بھر پور حصہ لیں گے ،ان خیالات کا اظہار جمعیت علماء اسلام ضلع لیہ کے جنرل سیکرٹری قاری منور حسین نے قائم مقام امیر مولانا حسین احمد مدنی ضلعی سیکرٹری اطلاعات مولانا اصغر تمیمی نے جے یو آئی ضلع لیہ کے مجلس عاملہ کے اجلاس سے خطاب کرتے ہوئے کیا ۔تفصیل کے مطابق جمعیت علماء اسلام ضلع لیہ کی مجلس عاملہ کا اجلاس دفتر نیو عرب میں منعقد ہوا صدارت مولانا حسین احمد مدنی نے کی اجلاس سے ان رہنماؤں نے خطاب کرتے ہوئے کہا کہ ایم ایم ایم کے اتحاد کو منظم اور فعال کیا جائیگااور اس پلیٹ فارم سے ہمارے امیدوار الیکشن میں حصہ لیں گے ۔انہوں نے کہا کہ دینی جماعتیں ایک دوسرے کی پگڑیاں اچھالنے اور فرقہ وارانہ ماحول بنانے کی بجائے متحدہ مجلس عمل کے اتحاد میں شامل ہوجائیں ۔مسئلہ ختم نبوت کو سیاسی ایشو نہیں بنانا چاہیے۔وطن عزیز اس وقت فرقہ واریت کا قطعاً متحمل نہیں ہے مذہبی ہم آہنگی کو فروغ دینے کی ضرورت ہے انہوں نے جماعتی ذمہ داروں کو جماعتی کام کو تیز کرنے کی ہدایت کی ۔اجلاس میں ضلعی نائب امیر مولانا عبدالحنان،ضلعی ڈپٹی سیکرٹری مولانا محمد عبداللہ،ضلعی سالار مولانا عبداللہ بلوچ،مولانا عتیق احمد نے بھی خطاب کیا۔
