چک نمبر 135 ،غیر قانونی سپیڈ بریکر عذاب جاں بن گئے ۔ لوگ سراپا احتجاج
لیہ(صبح پا کستان)لیہ کے نواحی چک چک نمبر 135ٹی ڈی اے میں بااثر افراد نے ایک کلومیٹر کے فاصلے پر دسیوں غیر قانونی سپیڈ بریکر بنا کر لوگوں کو اذیت میں ڈال دیا۔ سینکڑوں گھر وں پر مشتمل چک نمبر 135ٹی ڈی اے کے مکینوں کو لیہ و دیگر جگہوں پر جاتے ہوئے شدید مشکلات کا سامنا کرنا پڑتا ہے جبکہ متعدد بچے، بزرگ اور نوجوان بنے بڑے بڑے غیر قانونی سپیڈ بریکر وں سے اچانک موٹر سائیکلوں کے ٹکرانے سے شدید زخمی بھی ہو چکے ہیں جبکہ علاقہ میں چوری، ڈکیتی کی وارداتوں میں بھی اضافہ ہو گیا ہے۔ علاقہ مکینوں نے ان غیر قانونی سپیڈ بریکروں کے خلاف ڈی سی او لیہ کو بھی ڈیڑھ ماہ قبل درخواست گزاری مگر آج تک کارروائی نہ ہو سکی جبکہ درخواست دینے پر بااثر افراد علاقہ مکینوں کو خطرناک نتائج کی دھمکیاں بھی دینے لگے ہیں۔ چک کے مکینوں نے احتجاج کرتے ہوئے کہاکہ چک کی مین سڑک پر بنے متعدد غیر قانونی سپیڈ بریکروں سے ان کی سفری مشکلات میں اضافہ ہو رہا ہے اور بااثر اور شر انگیز افراد کھیل تماشے کے لئے آئے روز نئے سے نئے سپیڈ بریکر بنا کر ان کے لئے مشکلا ت پیدا کر رہے ہیں۔ انہوں نے کہاکہ چک 135ٹی ڈی اے کے شہریوں کی انتظامیہ بھی بات سننے کو تیار نہیں ، ڈیڑھ ماہ قبل دی جانے والی درخواست ردی کی ٹوکری میں ڈال دی گئی ہے، انہوں نے مطالبہ کیا کہ چک نمبر 135کی مین سٹرک پر بنائے گئے غیر قانونی سپیڈ بریکروں کے خلاف فوری کارروائی عمل میں لاتے ہیں ، ختم کرنے کے احکامات جار ی کئے جائیں۔
رپورٹ ۔ مہر زاہد سر فراز واندر پریس رپورٹر
