ملتان ۔پیٹرولیم مصنوعات کی قیمتوں میں جبری اضافہ کر کے عوام پر پیٹرول بم گرایاگیا ۔ پی پی پی کا احتجاج

ملتان( صبح پا کستان ) آصف علی زرداری نے 11 سال جیل کاٹی،جیل پیپلز پارٹی کارکنان کا دوسرا گھر ہے۔نواز شریف آمروں کی پیداوار ہیں وہ کن نظریات کی بات کرتے ہیں جبکہ ماضی میں اسامہ بن لادن سے پیسے لیکر بینظیر بھٹو کی حکومت گرائی۔ان خیالات کا اظہار پاکستان پیپلزپارٹی ملتان کینٹ کے رہنما عبدالحق خان، شیخ کاشف وارثی، ظفر اقبال بٹ، وقاص خان اور عدنان خان نے صحافیوں سے گفتگو کرتے ہوئے کیا۔ ان کا کہنا تھا کہ بے روزگاری، مہنگائی، تعلیم ،صحت جیسے مسائل نے عوام کو ذہنی طور پر نفسیاتی مریض بنا دیا ہے ۔عوام کے مسائل کے حل کے لئے پاکستان پیپلزپارٹی کردار ادا کرے گی،پیٹرولیم مصنوعات کی قیمتوں میں اضافے کے سوال کے جواب میں انہوں نے کہا کہ عالمی سطح پر پیٹرولیم مصنوعات کی قیمتیں کم ہونے کہ باوجود موجودہ حکومت نے عوام کو ریلیف دینے کی بجائے پیٹرولیم مصنوعات کی قیمتوں میں جبری اضافہ کر کے عوام پر پیٹرول بم گرایا اور نااہل پالیسیوں کی بدولت عوام کی زندگی اجیرن بنا دی ہے۔ پیٹرولیم مصنوعات کی مصنوعی مہنگائی موجودہ حکمرانوں کی نااہلی کا شاخسانہ ہے اس موقع پر مطالبہ کر تے ہوئے انہوں نے مزید کہا کہ پیٹرولیم مصنوعات کی قیمتوں میں کیا گیا ظالمانہ اضافہ فوری واپس لیا جائے ورنہ پیپلز پارٹی موجودہ حکومت کی ناکام پالیسیوں کے خلاف سٹرکوں پر نکلنے پر مجبور ہوگی۔