لیہ(صبح پا کستان) پاکستان پیپلز پارٹی چھوڑ کر پی ٹی آئی میں شمولیت کے بعد لیہ واپسی پر رفاقت گیلانی کا چوک اعظم میں تحریک انصاف کا شاندار استقبال، کارکنان نے ہار پہنائے، پھولوں کی پتیاں نچھاور کیں، عمران خان زندہ باد کے نعرے لگائے گئے۔ اسلا م آبا د بنی گالا سے واپسی پر تحریک انصاف ، یونائیٹڈ فرینڈز کیبنٹ کے کارکنان نے پیر رفاقت علی گیلانی کا چوک اعظم میں مینار چوک پر استقبال کیا۔ کارکنان نے پیر فاقت گیلانی پر پھولوں کی پتیاں نچھاور کیں اور ہار پہنائے۔ بنی گالا میں شمولیت کے بعد واپسی پر رفاقت گیلانی کے استقبال کے لئے سینکڑوں گاڑیوں پر مشتمل قافلے لیہ سے چوک اعظم پہنچے۔ کارکنان گونواز گو کے نعر ے لگاتے رہے اور ڈھول کی تھاپ پر جھمریں ڈالتے رہے۔ میڈیا سے گفتگو کرتے ہوئے رہنما تحریک انصاف پیر رفاقت گیلانی نے کہا کہ عمران خان ملک میں امیدکی واحد کرن ہیں جن کا ساتھ دینے کے لئے پی ٹی آئی میں شامل ہوا۔ رفاقت گیلانی کا کہنا تھاکہ عمران خان کی نئے پاکستان کی تحریک نے انقلاب برپا کر دیا ہے جس سے جھوٹ ، فریب، کرپشن ، رشوت کی سیاست کا خاتمہ ہو رہا ہے۔ انہوں نے کہا کہ وہ پی ٹی آئی کی ٹکٹ پر لیہ شہر کے صوبائی حلقہ 266سے الیکشن میں بھر پور حصہ لیں گے۔ استقبالیہ جلوس میں چیئر مین یونین کونسل بیٹ وساوا شمالی سردار سبط الحسنین خان تنگوانی، وائس چیئر مین یوسی سمرا نشیب زمان خان مگسی، ملک اسامہ جکھڑ، ملک علی جکھڑ،حاجی احمد کلاسرہ، رانا محمد سرفراز سمیت پی ٹی آئی کارکنان کی کثیر تعداد نے شرکت کی۔
