لیہ ۔ بہاؤالدین زکریایونیورسٹی بہاد ر کیمپس میں زرعی ریسرچ کے شعبہ کے لیے احسان پور سیڈ فارم کو یونیورسٹی سے منسلک کر نے کے لئے وزیراعلیٰ کو جلد سفارشات پیش کروں گا ۔ تجویز کردہ ریسرچ سنٹربہادر کیمپس کو یونیورسٹی کا درجہ دلانے کی جانب اہم پیش رفت ثابت ہوگا۔صوبائی وزیر مہر اعجاز احمد اچلانہ کا اعلی سطحی اجلاس سے خطاب ، اجلاس میں وائس چانسلر بہاؤ الدین زکر یا یونیورسٹی ملتان ، پروفیسر ڈاکٹر طارق محمود انصاری ،ڈپٹی کمشنرلیہ واجد علی شاہ ، ڈائریکٹر بی زیڈیو بہاد ر کیمپس ڈاکٹر مبشرحسین ،پروفیسر ڈاکٹر مہتاب احمد،پروفیسر ڈاکٹر عمران شریف چوہدری،پروفیسر ڈاکٹر انجم علی،پروفیسر مہر حفیظ اللہ تھند سمیت پروفیسرز ،ڈاکٹرز نے شرکت کی ۔

لیہ (صبح پا کستان)بہاؤالدین زکریایونیورسٹی بہاد ر کیمپس میں زرعی ریسرچ کے شعبہ کو وسعت دینے کے لیے احسان پور سیڈ فارم کو یونیورسٹی سے منسلک کر نے کے لئے وزیراعلیٰ شہبازشریف سے جلد ملاقات کرکے سفارشات پیش کی جائیں گی۔تجویز کردہ ریسرچ سنٹربہادر کیمپس کو یونیورسٹی کا درجہ دلانے کی جانب اہم پیش رفت ثابت ہوگا۔یہ بات صوبائی وزیر اقدامات برائے قدرتی آفات مہر اعجاز احمد اچلانہ نے بی زیڈ یو بہادر کیمپس میں اعلی سطحی اجلاس کی صدارت کرتے ہوئے کہی۔وائس چانسلر بہاؤ الدین زکر یا یونیورسٹی ملتان پروفیسر ڈاکٹر طارق محمود انصاری ،ڈپٹی کمشنرلیہ واجد علی شاہ ،کیمپس ڈائریکٹر بی زیڈیو بہاد ر کیمپس لیہ ڈاکٹر مبشرحسین ،پروفیسر ڈاکٹر مہتاب احمد،پروفیسر ڈاکٹر عمران شریف چوہدری،پروفیسر ڈاکٹر انجم علی،پروفیسر مہر حفیظ اللہ تھند،پروفیسرز ،ڈاکٹرز موجود تھے۔مہر اعجاز احمد اچلانہ نے کہا کہ بی زیڈیو بہادر کیمپس کو یونیورسٹی کا درجہ ملنے پر انجنئیرنگ ،میڈیکل ودیگر تدریسی پروگرامز کے اجراء سے ان علاقوں کے طالب علموں کو اپنی علمی ترقی کے لیے دوردراز کا سفر نہیں کرنا پڑے گا۔اس مقصد کے حصول کے لیے 135ایکڑ رقبہ پر بی زیڈ یوبہادر کیمپس مین بلاک میں تمام شعبوں کے لیے جگہ موجود ہے اور جدید ریسرچ کے لیے احسان پور سیڈ فارم کو بھی منسلک کردیا جائے گا۔انہوں نے وائس چانسلر بی زیڈیو ملتان سے اس سلسلہ میں تحرک کرنے کی ضرورت پرزور دیا۔اجلاس میں وائس چانسلر بی زیڈ یوملتان نے کہاکہ بہادر کیمپس کی تعلیمی ضروریا ت کو پورا کرنے اور تمام شعبوں میں جدید لیب کے قیام اور یونیورسٹی کادرجہ دلانے کے لیے اقدامات جلد اُٹھائے جائیں گے۔ڈپٹی کمشنر واجدعلی شاہ نے اجلا س سے خطاب کرتے ہوے کہاکہ یونیو رسٹی کے لیے اراضی کی فراہمی اور کسی قسم کی دیگر ضروریات کو پورا کرنے کے لیے ضلعی انتظامیہ کا بھر پور تعاون حاصل رہے گا۔اجلاس میں کیمپس ڈائریکٹر ڈاکٹر مبشر حسین نے کیمپس میں جاری بارہ مختلف پروگرامز کے 1530طالب علموں کے لیے تدریسی ضروریات ولیب کی سہولیات کے بارے میں آگا ہ کیا ۔اسی طرح انہوں نے بی ایس وایم ایس سی زوالوجی ،باٹنی ،میتھمیٹکس ،کیمپوٹر سائنسز ،فزکس ،کیمسٹری،اردو،انگلش پروگرامز کے اجراء کے لیے اساتذہ کرام و فنڈز کی فراہمی کے بارئے میں آگاہی دی۔بعدازا ں صوبائی وزیر مہر اعجاز احمد اچلانہ کے ہمراہ وائس چانسلر ڈاکٹر طارق محمود انصار ی نے یونیورسٹی کے مختلف شعبو ں کا معائنہ کیااور اساتذہ سے بریفنگ لی۔