ڈیرہ غازیخان(صبح پا کستان)صوبائی وزیر جیل خانہ جات ملک احمد یار ہنجرا نے کہا ہے کہ خادم اعلی پنجاب کی ہدایت پر پنجاب کی جیلوں میں اسیران کو ان کی صلاحیت کے مطابق فنی تعلیم دینے کے منصوبے کا آغاز کر د یاگیا ہے پہلے مرحلے میں سینٹرل جیلو ں میں قیدیوں کو کمپیوٹر ، ٹیلرنگ ، ہوم اپلائنسز ، الیکٹریشن ، پلمبرنگ ، کاج وا وورلاک کی تین ماہ کے دورانیہ کی تربیت دی جائے گی . اس اقدام کا مقصد خواتین و مرداسیران کو رہائی کے بعد اپنے کنبہ کی کفالت کیلئے معاشی طور پر کارآمد بنانا ہے .ان کورسز میں شمولیت کرنے والے اسیران کو ٹیوٹا کی طرف سے اسناد دی جائیں گی . اسناد حاصل کرنے والے اسیران بعد ازرہائی اپنا ذریعہ معاش شروع کرنے کیلئے 20ہزار روپے سے لے کر ایک لاکھ روپے تک بلاسود قرضہ حاصل کر سکیں گے اس مقصد کیلئے ٹیوٹا کا مختلف انڈسٹریز کے ساتھ معاہدہ طے پا چکا ہے . جیل وارڈنز کے سکیلوں کی اپ گریڈیشن کیلئے سمری حکومت پنجاب کو ارسال کر دی گئی ہے جس میں وارڈن کو بنیادی سکیل پانچ کی بجائے سات ، ہیڈوارڈن کو سات کی بجائے نو اور چیف وارڈن کو نو کی بجائے سکیل 11دینے کی سفارش کی گئی ہے .ا نہو ں نے یہ بات سنٹر ل جیل ڈیرہ غازیخان میں ٹیکنیکل ٹریننگ سنٹر کے افتتاح کے بعد فنی تربیت مکمل کرنے والے 106اسیران میں سر ٹیفکیٹ تقسیم کرنے کی تقریب سے خطاب کرتے ہوئے کہی.انہوں نے کہاکہ ٹیوٹا کے تربیت یافتہ اسیران کا نام ویب سائیٹ پر اپ ڈیٹ کیاجائے گا. متعلقہ انڈسٹری کو جیسے باہنر افراد کی ضرورت ہو گی وہ ان رہائی پانے والے اسیران سے خود رابطہ کر کے انہیں روزگار فراہم کرے گی. پنجاب حکومت نے فنی اور تیکنیکی شعبے میں ترقی کیلئے جامع حکمت عملی ترتیب دی ہے. اس خصوصی ہدف کی تکمیل میں وہ خود اور آئی جی جیل خانہ جات ٹیوٹا کے ساتھ مشترکہ طور پر مصروف عمل ہیں.بہتر نتائج کیلئے کورسز کا دورانیہ ہوم ڈیپارٹمنٹ کی مشاورت سے تین ماہ سے چھ ماہ تک بڑھانے کیلئے کوشاں ہیں . بعدازاں صوبائی وزیر نے جیل میں سات نئے منصوبوں کا سنگ بنیاد رکھا جن میں اسیران کو صاف پانی فراہم کرنے کیلئے واٹر فلٹریشن پلانٹ کی تنصیب ، نکاسی آب کے نظام کو بہتر بنانا ، 120جیل وارڈرز کیلئے سنگل وارڈ ڈبل سٹوری رہائش کی تعمیر ، ملازمین کیلئے 28 فیملی کوارٹرز کی تعمیر ، قالین و نوار سازی شیڈ کی تعمیر، خواتین وارڈ کی توسیع شامل ہیں جن پر مجموعی طو رپر 12کروڑ روپے خرچ ہوں گے. صوبائی وزیر نے کہا کہ جو منصوبے فنڈز کی عدم دستیابی کی وجہ سے رکے ہوئے ہیں ان کیلئے فنڈز جلدفراہم کیے جائیں گے. انہو ں نے محکمہ بلڈنگز کو ہدایت کی کہ وہ منصوبوں کی تعمیر میں معیاری مٹیریل کے استعمال کو یقینی بنائیں اور انہیں جون2017سے پہلے مکمل کریں. جیل کے دورہ کے دوران ڈی آئی جی جیل خانہ جات ملتان ریجن ملک شوکت فیروز ، سپرنٹنڈنٹ جیل جام آصف اقبال ، ڈپٹی سپرنٹنڈنٹس محمد اسدطارق ، محمد علی خاکوانی ، ایکسیئن بلڈنگز ہمایوں مسرور، ڈسٹرکٹ منیجر ٹیوٹا خورشید احمد چوہان ، اسسٹنٹ منیجر جمیل احمد طیب ، پرنسپل مدثر نواز صوبائی وزیر کے ہمراہ تھے . قبل ازیں صوبائی وزیر کے جیل پہنچنے پر ڈی آئی جی جیل خانہ جات ملتان ریجن ملک شوکت فیروز ،سپرنٹنڈنٹ جیل جام آصف اقبال نے ان کا استقبال کیا اور. جیل کے چاق و چوبند دستے نے انہیں سلامی پیش کی.
