لیہ( صبح پا کستان) عمران خان کی کال پر لیہ میں پی ٹی آئی کارکنان کی احتجاجی ریلی و احتجاج، حکومت کے خلاف شدید نعرے بازی کرتے ہوئے گونواز گو کے نعرے لگائے ۔اسلام آباد میں یوتھ کنونشن میں کارکنان کی گرفتاری اور پولیس تشدد کے خلاف تحریک انصاف کے سربراہ عمران خان کی کال پر لیہ میں بھی سیکڑوں پی ٹی آئی کارکنان سڑکوں پر نکل آئے۔ کارکنان نے کالج روڈ پر احتجاجی ریلی نکالی جس میں حکومت کے خلاف شدید نعرے بازی کی گئی۔ پی ٹی آئی کی ریلی ہسپتال چوک پہنچ کر احتجاجی جلسہ کی شکل اختیار کر گئی جہاں پی ٹی آئی کارکنا ن نے گونواز گو ز کے فلک شگاف نعرے لگائے۔ پی ٹی آئی کے مظاہرین نے مطالبہ کیا کہ حکومت ریاستی دہشت گردی بند کر ے اور پرامن احتجاج کرنے کا جمہوری حق دیا جائے اور گرفتار کارکنا ن کو فوری رہاکیا جائے۔ احتجاجی جلسے سے ضلعی صدر پی ٹی آئی بشارت رندھاوا ، جنرل سیکرٹری سمیع اللہ گرواں، ملک نیاز جکھڑ، افتخاربابر کھتران، ملک ہاشم سہو، ظفر اقبال واندر و دیگر نے بھی خطاب کرتے ہوئے گرفتار کارکنا ن کی فوری رہائی کا مطالبہ کیا۔
رپورٹ ۔ مہر زاہد سرفراز واندر
